Napoli-in Chilwell an duh

Serie A club Napoli chuan, Chelsea-a khelhna hmun chang lo Ben Chilwell chu lakluh tumin an hel niin khawthlang media-ten an tarlang a, English fullback hi season chawhnu lamah Italian club tan a inlan a nih pawhin a mak lo ang.

Chelsea hi coach thar Enzo Maresca hnuaiah an indinthar mek a, Blues manager hian nipui lai khan Chilwell hi a ruahmannaah a tel loh thu hrilhin, club thar zawng turin a ti.

Mahse, England tana vawi 21 inlan tawh fullback hian club dang zawm loin, Stamford Bridge-ah a cham chhunzawm a, tun season-ah Blues tan match khat chiah la khel vein, hei pawh League Cup lamah a ni!

Chilwell hi Napoli chuan January-ah hian season tawp thleng atan loan-a a hawh phawt a, nipuiah a ngheta lakluh an duh niin khawthlang media-te chuan an tarlang.

Napoli hian nipui lai khan Premier League aṭangin player pahnih, Manchester United midfielder Scott McTominay leh Brighton & Hove Albion aṭangin midfielder tho Billy Gilmour te an la lut a, player pahnih hi an la che ṭha rih hle.

Hei vang hian Antonio Conte kaihhruai team hian Premier League lam bawk an hawi leh niin a lang. Napoli hian Conte kaihhruaina hnuaiah harhtharna chang mekin, Serie A hmahruaitu an ni mek a, league match sarih khelh tawhah vawi nga chakin, vawi khat chiah an la tlawm a, vawi khat draw an nei.

Serie A table chung ber luah mekin, match sarih aṭangin point 16 an nei tawh a, anmahni hnaih bertu, champion lai Inter Milan chuan point 14 neiin, Napoli nen an khelh zat a inang.