Sir Alex-a'n United a chhuahsan dawn

Manchester United legendary coach Sir Alex Ferguson chuan season tawp rualin United Global Ambassador leh Director a nihna chu a chawlhsan dawn a, hei hi club-a share neitu thar Sir Jim Ratcliffe thutlukna niin an sawi.

Kum 2013 khan Sir Alex hian football coaching a chawlhsan a, coaching a chawlhsan hnuah hian club ambassador ni zuiin, a hlawh hi kar khatah £235,000 a la tling daih - kum 82 mi Sir Alex hian world class player hlawh ang zat a la hlawh phak!

Mahse, Premier League-a vawi 13 ngawt United champion puitu coach hi kar hmasa khan Sir Jim Ratcliffe nen an indawr a, chawl turin thutlukna an siam fel. United neitu zinga mi Sir Jim Ratcliffe hian Red Devils sum senna tam tak chu tihhniam tumin hma a la mek a, hei hi team enkawl nana sum tam zawk hman theih nana ruahman a ni.

Thla hmasa lawk khan United hian pound maktaduai 113 an hloh thu an puang a, hei hi Premier League-in kum thum chhunga club tinte sum hloh theih zat a bituk £115mtd nen a inhnaih hle.

Hetiang a nih avang hian United hian uluk zawka sum sen dan kalpui an tum a, club staff 250 bawr vel chuan hna an chân phah dawn bawk - heta ṭang ringawta kum khata an sum hum theih tur chu £10mtd vel a ni dawn a ni.