England-in Pep Guardiola an dawr

Gareth Southgate-a'n a bansan hnuah England-in coach zawn hna an thawk zel a, season tawp ruala a contract hmang zo tur Pep Guardiola chu Three Lions boss ni thei dinhmunah a ding mek.

English FA hian Pep hi official tak ni lo chuan an be tawh a, Spanish manager chauh lo pawh, coach dang dawr an nei nual. Mahse, Etihad Stadium-a a contract hmang zo tawh tur Pep hian England enkawl a duh a nih chuan, an duhthlan hmasak ber a nih tur thu English media-ten an tarlang.

Barcelona leh Bayern Munich coach pawh lo ni tawh Pep hian club football-ah chuan nomawi chawi theih ang zawng zawng a chawi kim tawh a, a kalna apiangah a hlawhtling zel. City pawh hian chelh an duh a, mahse, thutlukna a la siam lo.

Pep hian England dawrna pawh hi a la chhang lo hrim hrim a, mahse, rei lotêah thutlukna a siam dawn niin an sawi. Kum 53 mi manager chuan, "City ka chhuahsan dawn anga thusawi awm hi a dik lo a, thutlukna ka la siam lo. England coach tur anga min sawi pawh a dik lo a, thutlukna ka siam hunah chuan ka sawi em em ang.

"Keipawhin ka hma hun ka la sawi thei lo a, eng pawh thleng thei a ni," a ti a, thutlukna a la siam loh thu a sawi rualin Three Lions enkawl lo tur tawp ang chuan a insawi duh lo.