NBA vawi thum champion Green a chawl

Shooting guard ṭha leh hmuhnawm bik zinga mi Danny Green chuan basketball a chawlhsan thu a puang, a vanglai chuan Green hian team hrang pathum tan NBA champion nomawi a chawi a ni.

Green hian kum 2014 khan San Antonio a hlawhtlinpui a, a hnuah Toronto (2019) leh Los Angeles Lakers (2020) te a champion pui leh bawk a, heng team pathum tan hian inkhel bul ṭantu zingah a tel phak vek.

Kum 37 mi Green chuan, "Tunah chuan basketball leh NBA ka mangṭha a hun ta. Basketball zinkawng nuam leh hlimawm tak ka zawh a, kum 37 mi ka nih ve takah chuan ka taksa in chawlh a mamawh tih ka hria.

"Basketball ka khelh chhung khan a ṭha ber chu ka ni lo tih ka hria, mahse a ṭha zinga mi chu ka nih ve ngei pawh ka beisei. Kum a tam a, vanglai a liam chuan taksa in a tlin loh bakah, team lamin min mamawhna a tlahniam," a ti a, a nuna chona dang hmachhawn tur leh zinkawng thar zawh tura a phur thu a sawi tel bawk.

Green hian NBA huang chhungah 3-points vawi 1,577 tehmeuh mai a vawm lut. Basketball inelna ngaihhlutah hian 3-points neih tam lamah 43-na a ni phak hial. Playoff chinah bik 3-points vawi 315 a nei thei, hei hi a shoot aṭanga tehin 40% a tling hial a ni.