NFA Playoff Heat tan vawi khat chak chauh a ngai tawh

NBA Finals 2020 khel turin Miami Heat tan match khat chak chauh a ngai tawh. Nimin zing Eastern Conference Finals game 4 inkhelah Heat hian Boston Celtics 112-109 in an hneh a, series-ah 3-1 in hma an hruai.

Tukin hian Western Conference Finals lamah Los Angeles Lakers leh Denver Nuggets ten game 4 an khel ve thung, regular season laia pakhatna Lakers hian 2-1 in hma an hruai mek. Conference champion pahnih hian NBA champion nih an inchuh leh dawn a ni.

Nimin zinga Basketball court chhunga inlan hoah Tyler Herro a naupang ber a, kum 20 mi chauh ni mah se Tyler Herro a buai chuang lo - American guard hian point 37 neiin Heat tana tha thawh hlawk ber dinhmun a luah.

Herro hi a bul ṭantu player panga zingah a tel lo a, bench aṭanga lutin minute 36 chhung a khel. Point neih tuma 'attempt' vawi 21 a neih zinga 14 ngawt a hlawhtling, ani bakah hian Jimmy Butler (24 points) leh Goran Dragic (22) ten an thawh hlawk bawk.

Heat coach Erik Spoelstra chuan, "Ka nauten an khel ṭha vek, chutihrualin Tyler Herro khan fak a phu zual hlein ka hria. A inringtawk em em a, hun remchang a hmuh chuan a chhawr ṭangkai thei zel.

"Tawnhriat la ngah lo mah se midang hnen aṭangin thurawn a la hnem, training-na lamah theihtawp chhuah ṭhin a nihna chu court chhungah a takin a rawn lang ta a ni," tiin a sawi a, game 5 an khelh hunah pawh beisei an neih san thu a sawi bawk.

Regular season-ah khan Boston Celtics hi pathumna an ni a, an chunga awm pahnih chu an tla tawh. Miami Heat hi pangana an ni thung. Eastern Conference Finals khelh hma lama an khelh dan thlir chuan Celtics hi an buk a rit zawk hreta ngaih a ni.

Mahse, inelna pawimawhah Heat lam an chefuh hmasa zawk - game hmasa pahnih an la nghal a, game 3 hloh mah se game 4-ah an tho chhuak leh nghal. Celtics hian inkhel bul an ṭan fuh lo ṭhin a, tun ṭumah pawh hian quarter pahnihah an hniam zawk.

Celtics coach Brad Stevens chuan, "Inelna a la tawp lo, keini chuan match hnuhnung ber thlengin kan theihtawp kan chhuah dawn a ni. Game 5 kan la a nih chuan a hnuhnung pahnihah pawh kan beisei thei ang," a ti.

Tlang tur chuan game li lak a ngai a, Celtics hian NBA Finals lut tur chuan khelh hmabak match thum an la neihah an chak vek a ngai tawh tihna a ni. Heat tan erawh a thiam ber zawnna a tel turin vawi khat chak a tawk.