LZ Juice MPL11: Hneh loh tawng lo 'Victor-a Aizawl FC'

LZ Juice MPL11-ah Victor Lalbiakmawia kaihhruai Aizawl FC chu hneh loh nei loin an champion a, MPL record thar an siam. I League club hian October 15, Thawhlehni zan khan final-ah Mizoram Police an hmachhawn a, Lalawmpuia Sailo goal ropui hmangin hnehna an chang.

Aizawl FC-in tun season match 17 an khelh aṭangin vawi 13 hnehna an chang a, vawi li an khingpui nen an inhnehtawk - hneh loh an tawng lo. I League club-in a vawi nga nan MPL nomawi an chawi a, foreigner tel loa an champion hmasak ber a ni.

Cho leh cho

MPL champion lai Mizoram Police-in semifinal-a bul ṭantute bawk bul an ṭan nawntir a, player 11 te hi a ngai vek ni mah se an khelh dan hmang a danglam. Police coach Lalbiaksanga Colney-in inkhelh hmaa a sawi ang ngeiin Aizawl FC an cho a, a player-ten goal venhim hna khel loin goal khung tumin bul an ṭan.

Aizawl FC-in tlarhnung an tidanglam lo a, captain Lalchhawnkima hoin bul an ṭan. Midfield-ah Samuel Lalmuanpuia a dam hman loh avangin Churchill Brothers aṭanga an lak OmOm-a'n bul a ṭan a, Peter Lalrinhlua aiin an club academy chhuak H. Lalruatfela'n bul a ṭan bawk.

I League club tan chanchin lawmawm a awm a, goal 12 khung tawhtu Lalbiakdika a dam hman. Champhai Zotlang tlangval hi mual sirah Augustine Lalrochana nen bul an ṭan a, Aizawl FC goal bawh a na sawt.

Goal chance a tam

Final boruak sangah team pahnih an phur tih a lang a, entu ṭhahnem tak chuan an phurna a belhchhah bawk. Aizawl FC midfielder OmOm-a freekick chu goalkeeper R. Malsawmkima'n a dansak. Police-in an nawr ngam avangin tlarhnung a thawl hret a, Aizawl FC winger pahnih BD-a leh Augustine te an lansarh phah hle.

Police wing back Lalruatpuia'n winger tlan chak Augustine-a dan harsa a ti a, keeper Man-a chet ṭha zarah an him hram. Lalbiaksanga Colney hote set piece-ah an ṭha a, R. Malsawmtluanga ball pet thiamna hmuhin a awm.

MS-a freekick pet hmasa ber chu keeper Vanlalhriatpuia'n hnek chhuakin Police striker F. Lalrinpuia'n goal-ah a pet nghal a, keeper-in dang hman lo mah se captain Lalchhawnkima'n a dang hman. Police midfielder MS-a hian freekick aṭangin crossbar a pet per a, a hnuhnung zawkah crossbar chungah chiah a pet bawk.

Mahse, Police aiin Aizawl FC an khel ṭha zawk. BD-a ball pass ṭha chu Fela Hlawndo-in goal-ah a chantir thei lo. OmOm-a cross ṭha zet pawh Lalhriatpuia'n goal-ah ṭha takin tauh mah se Police keeper Mana'n a dang ṭha takzet.

Goal ropui chu

Minute 35-naah Police-in ball an hloh ho hret a, defender Kimkima'n a chhuhsak ṭha ve bawk. Augustine-a'n captain Kimkima hnen aṭanga a ball hmuh chu best player atana thlan zui tak Lalthankhuma hnenah a pe a, Cherhlun tlangval hian OmOm-a tan a pe.

Dinthar tlangval OmOm-a'n a pet thiam lam, ke vei lam tana pet nuam tura a tih per hnuah goal-ah a pet nghal a, Police goalkeeper Mana'n dan ngaihna a hre lo. Goal mawi bik a ni a, OmOm-a goal ropui hi champion-na goal a ni zui bawk.

AFC an ṭha hret

Goal luh hnuah pawh Aizawl FC an khel ṭha zawk a, goal dang khung belhna remchang pawh an ngah. AFC striker C. Hriata'n a hun ṭha neihah a khung thei lo a, Augustine-a pawhin ṭhiante pek aia amaha tih thlangin a khung thei chuang lo.

OmOm-a ball vawrhluh Police defender Rinchhana'n an lamah tauhin, keeper Mana a lo chhuah avangin a goal teuh hle. Augustine-a cross ṭha zet pawh BD-a'n a khung teuh hle.

Aizawl FC vanneih ṭum ni se, penalty hlawh chhuak ngei tur an ni a; box chhungah Police defender FC-a'n Augustine-a titlu mah se referee-in penalty a pe lo.

Chutihrualin injury time-ah Police defender Lalmuanfela'n corner aṭanga a ball hmuh ṭha zet chu a tauh over a, BS-a hoten si phurh an sut thei ta lo. Police-in an nomawi an hum thei lo a, Aizawl FC-in a vawi nga nan MPL nomawi an chawi thung.

Thawhrimna rah a thlum

Aizawl FC-in I Day Football final-ah Mizoram Police an hneh tawh loh avangin an fimkhur a, hnehna an chan theih nan an fimkhur bawk. Police khelh dan an zir chiang a, final khelh hma hian Police-in freekick vawi 11 an khung thu te, chung zinga vawi kua chu tauh luh a nih thute an hre vek.

AFC coach Victor Lalbiakmawia chuan, "Tlawm nawn kan tum lo a, kan chak lohna khan thawhrimna min pe. Coach-te pawh kan ṭang a, Police kan zir chiang a, final-ah pawh chak phu zawk kan ni. Player-te pawh an thawkrim a, keini ai mahin Police hneh an châk a, kan tum ram kan thleng," tiin Vanglaini a hrilh.

Inkhelh hmain Victor-a'n I Day Football final-a chak loh vanga lungngaih mittui chu lawmna mittuia an thlak tur thu a sawi a, a thusawi dikna hmuh turin a awm.

Police coach Lalbiaksanga Colney chuan, "Goal ṭha bik vangin kan chak lo a, ka naute an khel ṭha. Aizawl FC ka lawmpui, champion an phu," tiin a sawi ve bawk.