Match khat zel atan rilru kan pe - F. Lalrinmawia, Aizawl FC manager

A hmasa berah chuan Pathian awmpui leh malsawmna vang a ni.

Club neitu leh president te chhungkua inpekna ropui tak avang te leh NECS staff zawng zawng te, club Director leh sporting Director-te leh Aizawl FC office staff zawng zawng te inpekna leh thawhrimna avangin hetiang dinhmun hi kan tawng thei a. A lawmawm tak zet zet a ni.

Tun season MPL ṭan thleng khan transfer banned kan nih avangin kan buai ve hle. Players ṭhahnem takin club lian zawkah te min han chhuahsan a. A thlakna tur te bawk mah ila, 'transfer banned lift' a la nih miau loh avangin kan register thei mai lo. Academy player-te kan tum aia tam senior team-ah kan sawn chhoh phah.

A lo awmsa ten theihtawp an lo chhuah zarah result ṭha tak kan nei zel tho a. Chu chuan mi tharte tan pawh phurna leh thawhrimna nasa tak a siamsak a. Inelna thianghlim tak player-teah a awm chho nuk a ni.

Coach-ten player thlan an thiam a. Players lungawi lo an awm lo. Chance ṭha tak an pe vek a. Khel tlem leh tam a awm loh theih loh rualin tupawh mai hi inkhel turin an inpeih vek. Match khat zel atan rilru kan pe a, video session te nen kan inbuatsaih. Ka opponent team tur te hi keini aia ṭhaah kan dah vek mai. Whistle rik aṭangin theihtawp an chhuah a. Pressure kan pe na ngai lo. Tichuan match khat te te kan chak zel a. A tawpah record kan siam hial.

Min ṭawiawm tlattu kan chhungte, fan-te zawng zawng chungah lawmthu kan sawi tak meuh meuh e.