MPL trophy pawh a in puiah a rawn kir leh ta - Hmingthana Zadeng, Aizawl FC Sporting Director

A hmasa berin Pathian chungah lawmthu ka sawi. MPL season khat chhunga tlawm nei miah loa kan champion hi beisei phak bak a ni. Staff leh player-te thawhrimna malsawmin a awm. Champion kan châk em em a, season tirah harsa takin kan reserve player te loin bul kan ṭan kha a ni a, kan nauten hma an sawn em em mai hmuh hi a hlimawm ka ti.

Kan coach-te hnathawh avangin game nghet ṭha tak kan neiin ka hria, season tluan performance en hian champion hi kan phu ka ti ve tho mai. Season hmasaah MPL Under 17 match hmasa pahnih chak loh hnuin a naute a champion pui a, harsatna hrang hrang avangin coach lailawk (Interim Coach) angin kan senior-ah bul a ṭan, thawhpui nuam tak coach kan nei hi ka lawm tak zet zet.

Tun season aṭang min rawn zawm thar kan assistant coach hnathawh hi sawi hmaih chi a ni lo ang, a active em em, nasa takin coach a pui, kan fitness trainer Alan leh kan physio ten season tira player an enkawl ṭhat avangin season tluanin kan player-ten an perform thei.

Team manager inpe em em kan nei hi club tan a hlu ka ti, coaching team inlungrualna hian rah duhawm tak a chhuah niin ka hria. Aizawl FC Staff dang zawng zawngten kil hrang hrangah taima taka an hnathawh rah a ni e. Club owner-te chhungkaw chungah thinlung takin lawmthu ka sawi mawlh mawh a, an inpekna hi a ropui thlawt a ni.

MPL trophy vawi nga chawi hi a awlsam lo takzet. Tunah chuan MPL trophy pawh a in puiah a rawn kir leh ta.