England coach thar Thomas Tuchel

Pep Guardiola nen sawizawm an nih hnu lawkah England chuan coach thar an nei a, a hming chu Thomas Tuchel a ni. Football Association chuan German coach an lakluh thu hi nimin khan an puang a, January 2025 aṭangin a hna a ṭan ang - thla 18 atan contract a ziak.

Euro 2024 final-a Spain an ngam loh hnuin England hi coach Gareth Southgate chuan a bansan a, hemi hnu hian coach nghet la nei leh loin, coach lailawk Lee Carsley chuan a enkawl.

England Under-21 boss Carsley pawh hi Three Lions enkawl thei tura ngaih a ni hman a, season tawp ruala Etihad Stadium-a contract hmang zo tur Pep Guardiola hming chu lam rik a ni bawk.

Mahse, a tawpah chuan Tuchel la lut turin England-in thutlukna an siam a, FA chuan kar hmasa khan contract ziah a nih tawh thu an sawi - Premier League-ah Chelsea a lo enkawl tawh avangin English football-ah a mikhual lo.

Hna hmasa

Kum 51 mi Tuchel-a hna hmasa tur chu World Cup 2026 khel tura England hruai kai a ni dawn a, Mexico, USA leh Canada ten an inthlen ṭawm tur inelnaah hian an inpetkai mai chu a rinawm - a tournament takah pressure a sang leh ang!

Fans lakah tlatlum lo viau mah se, Southgate khan result chu a nei ṭha. Euro-ah vawi hnih ngawt final a hruai thleng a, UEFA Nations League-ah pathumna a nihpui tawh a, World Cup semifinal a hruai thleng bawk.

England hian City boss Pep pawh an dawr ngei a, mahse, Spanish coach hian chhanna mumal a pek loh avangin coach dang an thlithlai zui. Tuchel-ah English FA an inlungrual a, England a enkawl tawh dawn.

Hetihrual hian November international break bikah chuan Lee Carsley bawkin England hi a la kaihruai dawn a, coach lailawk ni tura an inlakluha inremna awm sa a ni - UEFA Nations League an khel ang.

Tu nge Tuchel

Tuchel hian German club FC Augsburg reserve team aṭangin a coaching career a zawh ṭan a, result a neih ṭhat avangin kum 2009 khan Bundesliga club Mainz 05 chuan an coach ni turin an la lut.

Mainz a enkawl lai hian club lian zawk Schalke 04 leh Bayer Leverkusen ten sawm mah se a hnar a, a hnu April 2015 khan Jurgen Klopp-a hmun ruak luah turin Borussia Dortmund chuan an la lut.

Bundesliga club hi season hnih enkawlin, DFB-Pokal-ah a champion pui a, a hnuah Paris Saint-Germain pan lehin, French club tan hian Ligue 1 (2), Coupe de France, Coupe de la Ligue leh Trophée des Champions nomawite a chawi.

Tuchel hian PSG hi an club chanchina a vawi khat nan Champions League final hial hruai thleng mah se, club thuneitute nen an inhmuhthiam loh avangin ban a ni a, Paris khawpui a chhuahsan.

English football & Tuchel

January 2021 khan Tuchel hian Chelsea zawmin, thla 18 atan contract a ziak. German coach hian Blues hi season laihawla zawm duh lo mah se, coach lailawk atana sawm Ralf Rangnick chuan Blues hi a hnar a, hei vang hian January-ah Chelsea hi a zawm.

Mahse, German coach hian thutlukna a siam sual lo. Champions League final-ah Chelsea hruai thleng nghalin, final-ah Manchester City chu 1-0 in an hneh a, an champion. Tuchel hian UEFA Super Cup leh FIFA Club World Cup-ah champion nomawi a chawi bawk.

September 2022 khan Blues nen pawh an inṭhen a, club thuneitute nen an inhmuhthiam loh vang a ni pakhat. March 2023-ah Bayern Munich zawmin, a season hmasa berah Bundesliga nomawi a chawi a, a season hnihnaah a nil.

Tuchel hi Bayern nen inhriatthiam tawnnain an inṭhen a, German club hian an beisei ang coach an hmuh leh mai loh hnuah Tuchel hi chelh tum leh mah se, a lo duh tawh bik lo a, tunah chuan England coach a ni dawn ta.

Thu duh Tuchel

Tuchel-a chanchin an sawi apianga an sawi lan pakhat chu a thu duh hi a ni - PSG, Chelsea leh Bayern-ah te club thuneitute nen an inhmuthiam lo vek a, an inhmuhthiam lohna chhan langsar tak hi transfer chungchangah a ni fo.

German chanchinbu lar Bild-a head of football ni lai Christian Falk chuan, "Tuchel hi thawhpui awlsam tak a ni bik lo. Germany-ah chuan a club thawhna hotute nen an inhmu thiam lo ṭhin a, England-ah chuan a danglamin ka hria.

"England hi nuam a ti a, Germany aiin England-ah zah a kai zawk a, hei vang hian lo kir leh pawh hi a châk reng ṭhin. Club thuneitute nena an inhmuh thiam loh fona chu transfer a ni a, national team-ah chuan chutiang harsatna chu a awm ve dawn lo a ni," a ti.

Chelsea defender hlui Pat Nevin chuan, "Chelsea-a awm laia min hneh em emtu chu a awmna hmun a zira a inher rem thei kha a ni," a ti a, England national team pawh ṭha taka a enkawl theih a beisei - hunin a hril ang.