Messi-a hattrick hmangin Argentina chak

Lionel Messi chuan player ropui leh danglam bik a nihna chu a takin a lantir leh ta - nimin zing khan Messi hian Bolivia lakah goal thum khungin Argentina chu 6-0 in a chakpui.

Argentina khawpui Buenos Aires a stadium hmingthang tak pakhat Estadio Mâs Monumental-ah world champion tan buaina tur a awm lo, a khat mawi tawkin Messi leh a ṭhiante hian goal an khung deuh reng a ni ber.

Messi-a'n ball kang la thlain, goalkeeper Guillermo Viscarra chauh a hmachhawn hnuah inringtawk tak maiin goal kilah a khung a,chawlhlawk hmain Lautaro Martinez leh Julian Alvarez te tan a siamsak bawk.

Inter Milan striker Martinez-a'n goal a khung dawn hian, duh ni se la chu a siamsaktu Messi khan amahin a khung thei ang, box laiah awmin keeper chauh a hmachhawn tawhah Martinez tan a siamsak ta zawk a ni.

Hun tawp dawn lamah Messi hian goal hnih dang a khung belh, a ṭhiante ball dan per chu la fuhin amah vengtu player a paltlang hnuah hla deuh tak aṭangin goal kilah kawh lutukin a pet lut a, ani bakah hian Thiago Almada chuan goal khat a khung bawk.

Argentina tan match 189 a khelh aṭanga goal 112 khungtu Messi chuan, "Min ṭana min thlawp ṭha em emtute hmaa inkhelh hi chu a nuam, ka hming an lam rik dual dual laite kha ka rilru a hnehin awm dan ka thiam lo lek lek zawwk a ni ber mai.

"Engtik hnuah nge ka chawlh ang tih pawh ka sawi thei lo, tunah chuan nuam ti takin Argentina tan ka la khel tawp mai a ni. Min hmangaih tute nena football khelh a nuam ka ti a, tun hma zawng aiin nuam ka ti zawk emawni tih mai tur a ni," a ti.

South America World Cup qualifier inkhel dangah Brazil chuan an mikhual Peru chu 4-0 in an sawp. Raphinha chuan penalty vawi hnih a khung a, Barcelona forward bakah hian Andres Pereira leh Luiz Henrique ten goal khat ve ve an khung bawk.

Tun hnaiah Brazil an rawn che ṭha ve leh ta a, an match hnuhnung pahnihah an chak. World champion vawi nga ni tawh hian match 10 aṭanga point 16 hmuin palina dinhmun an luah a, an chungah Uruguay, Colombia leh Argentina te an awm.

Luis Suarez-a'n a sawisel avanga boruak nei deuh hluai, coach Marcelo Bielsa enkawl Uruguay erawhin goal an khung thei lo a, an mikhual Ecuador nen goal lut lo, 0-0 in an inhnehtawk a, point khatah an lungawi a ṭul.