ISL khel leh tawh dawn

International break avanga an chawlh hnuin Indian Super League chu zanin dar 7:30 hian khelh chhunzawm a ni leh tawh dawn a, NorthEast United-in Chennaiyin an mikhual ang.

Juan Pedro Benali enkawl NorthEast United hian season bul ṭan nan match hmasa berah Mohammedan SC chu 1-0 in hneh mah se, a hnu match thumah chak an nei leh tawh lo - vawi hnih draw-in, vawi khat an tlawm a, heng match thumah te hian goal an khung hmasa zawk vek!

Highlander-in zanina Chennaiyin an hmachhawn hunah insiamṭhat an tum ang. Chutihrual chuan Owen Coyle-a enkawl Chennaiyin pawh bul ṭan ṭha, beisei anga result nei zui lo an ni ve tho.

South Indian club hian an match hmasa berah Odisha chu 3-2 in hneh mah se, Mohammedan SC lakah 1-0 in an tlawm zui a, match hnuhnung berah ISL team nem ber ang hiala ngaih theih Hyderabad chu an draw thei hram bawk.

Guwahati khawpuia inkhelah chak ngei an tum ang. South Indian club hian Mizo pathum, tun international break-a India tana a match hmasa ber kheltu Lalrinhliana Hnamte, Laldinliana Renthlei leh PC Laldinpuia an nei a, player pathum hian match thum an khelh tawhah bul an la ṭan vek.