Angel di Maria an hrem na

Paris St-Germain forward Angel di Maria chu Ligue 1-a Marseille nen an inkhelh ṭuma buaina chhuaka a inrawlh avangin match li chhung khel thei lo tura hrem a ni. 

Kum 32 mi midfielder hi Marseille defender Alvaro Gonzalez chil chhak khumah puh a ni a, Ligue 1 thuneitu lam chuan hrem a nih chhan hi a chil chhak vang a nih leh nih loh an sawi lo. 

Marseille laka 1-0 a an tlawmna inkhelah hian video assistant referee chuan Di Maria hi hrem loh a thlang a, mahse thuneituten an ennawn leh hnuah match li khel thei turin an hrem ta a ni. 

September 13 inkhela buaina chhuakah khan PSG player zingah Neymar, Leandro Paredes leh Layvin Kurzawa-te chu hnawhchhuah an ni a, Marseille player zingah Jordan Amavi leh Dario Benedetto chu hnawhchhuah an ni bawk. 

Brazilian forward Neymar hian khelmual a chhuahsan pahin fourth official hnenah vun rawng inthliarna lam hawia ṭawngkhum a nih thu a sawi a, Spanish defender Gonzalez chu he ṭawngkam hmangah hian a puh. PSG chuan Neymar an thlawpna thu hi an tichhuak tawh a, Neymar-a puhna phatu Gonzalez hi a club khelhna Marseille chuan midang hmuhsit ching a nih loh thu sawiin an lo chhan tawh bawk. 

French football a league-te enkawltu Ligue de Football Professionnel (LFP) chuan Di Maria hremna hi September 29 aṭanga a inṭan tur thu an sawi a, Neymar leh Gonzalez inkara buaina awm chu an chhui zui bawk ang. 

LFP chuan Neymar hi match hnih khel thei lo turin an hrem tawh a, amah ang thoa PSG player hnawhchhuah Kurzawa chu match ruk atan hrem niin Paredes chu Neymar ang thoin match hnih atan an hrem. Marseille lamah Amavi chu match thum khel thei lo tura hrem a ni a, Benedetto chu match khat atan hrem a ni bawk.