Ozil anga thiam hi an tam lo - Ljungberg

Arsenal midfielder hlui, senior team pawh enkawl lailawk tawh Freddie Ljungberg chuan Mesut Ozil chungchanga club thutlukna siam chu a hrethiam lo a, inkhel ve leh ngei se a duhsak thu a sawi bawk.

Germany international hlui hian March thla hnu lamah Gunners tan a la khel leh lo. Premier League leh Europa League squad-ah telh a ni lo a, kumin chhung chu an chhawr dawn lo tihna a ni. January thlaah squad an siam danglam a, an telh a nih erawh chuan a la inkhel leh thei.

Ozil hnawltu Arsenal hian beisei an phak lo, a bik takin an goal nawr a na lo hle. League match 11 an khelh aṭangin goal 10 chauh an la khung! Mikel Arteta naute hi 15-na an ni mek a, hmahruaitu Tottenham Hotspur an phak lohna chu point 11 a ni.

Ljungberg chuan, "Ozil anga thiam player neih chu lawmna tur a ni, match zawng zawngah a khel vek ang ka ti erawh a ni lo. Inkhel eng emaw bikah ball pass mawi leh midangin an tih theih loh ti tur kan mamawh a nih chuan Mesut hi a chhanna a ni ang.

"Goal venhim lamah a chak tawk lo tih chu ka hria, hemi hre chung hian hetiang thu hi ka sawi. Chhawr rim tur a ni emaw, ni lo emaw pawh ni se player ziah luh 25 zinga a tel lo hi chu ka hrethiam lo a ni," tiin a sawi.

Gunners player hlawh hnem Ozil fak zuiin Ljungberg chuan, "Player thiam bik an awm a, striker tana ball pe thiam leh khingpui defender hma a chiai miah loa ball thunun thei tlemte an awm, chung zinga mi chu Ozil hi a ni, a khelhna hmunah hian ani aia ṭha tlan tur an tam chuang lo," a ti.

Arsenal-in Ozil an hnawl chhan tak hi sawifiah a ni lo. A khel ṭha tawk lo nge training-na hmunah a ti ṭha lo tih pawh sawi a awm lo a, mi ṭhenkhat chuan sakhuana lama China nen an inmil loh vang niah an ngai thung.

Gunners manager Arteta-a'n team a enkawl tirh pawh khan Ozil hi a chhawr rim viau, a hnu lamah erawh a tan squad-ah pawh hmun a awm lo. Spanish manager hian, "Football vang," tiin Ozil an chhawr loh chhan an sawi tawh, fans lamah awih lotu an tam hle.

Ozil hian Arsenal tan a khel tawh dawn lo niin a lang, a contract zawh hma season chanve a la neihah hian an ko kir dawn em tih chu zawhna lian tak a ni. Emirates Stadium a inkhel entu an kir leh hlim pawhin 'Bring back Ozil' tih thuziak hmuh tur a awm.