Tsitsipas lakah Evans a chak lo

French Open inbuatsaihna pakhat Hamburg European Open khelh laiah Nilaini zan khan British number 1 Dan Evans chu Stefanos Tsitsipas lakah a chak lo nghal.

Seeded pahnihna Tsitsipas hian minute 59 chhungin 6-3, 6-1 in hnehna a chang. Greek tlangval hian US Open-ah khan beisei a phak lo a, clay court lamah erawh season dang ang bawkin player tawhkhirh tak a ni chhunzawm leh ang.

Thawhlehni khan Daniil Medvedev chu Ugo Humbert hneh loin a lo tla nghal tawh bawk, mipa singles seeded pakhatna hian hneh nei loin inelna a mangṭha tihna a ni.

Russian tlangval hian tun season chhunga a clay court match hmasa ber a khel a, chak tura rinkai zawk ni mah se 6-4, 6-3 in a chak lo. World number 5 hian a service vawi thum a hloh a, a khingpui service hi vawi khat bak a chhuhsak ve thei lo.

Kum 24 mi Medvedev hi US Open khelh zawh takah khan semifinal-ah a tla a, a hneh loh Dominic Thiem chu a champion zui. French Open khel turin a inbuatsaih chhunzawm nghal a, hard court ai chuan clay court-ah hian inkhelh harsa a ti zawk niin a lang.

Medvedev hian French Open hi vawi thum a khel tawh a, first round a la paltlang ngai lo! Kuminah hian ranking sang zinga mi ni mah se Paris khawpuia tournament-ah hian rinkai zingah a tel 

dawn lo.

Inkhel dangah Roberto Bautista Agut chuan vawi hnih champion tawh leh nomawi kawl mektu ni bawk Nikoloz Basilashvili chu 6-4, 6-3 in a hneh. Spanish player hian a match leh pekah chuan Dominik Koepfer a hmachhawn leh ang.