Aston Villa-in Barkley leh Loftus-Cheek an beisei

Nipui transfer a bazar nasa ber pawl Aston Villa-in duh tawk mai an tum lo a, Chelsea player pahnih Ross Barkley leh Ruben Loftus-Cheek chu loan a lakluh theih an beisei. 

Mahse, Premier League danah club pakhatin a rualin club pakhat aṭangin player pahnih loan hmanga hawh theih a ni lo a, Villa hian Barkley leh Loftus-Cheek inkarah an duh zawk an thlan a ngai ang. 

Villa hian Chelsea striker Tammy Abraham chu loan-a lak tumin an lo dawr tawh a, mahse English striker hian Stamford Bridge chhuahsan ai chuan khelhna hmun chan tuma beih a thlang zawk. 

Aston Villa hian tun season Premier League-ah match khat khel tawhin Sheffield United chu 1-0 in an hneh a, transfer bazar-ah pound maktaduai 80 dawn an seng tawh. Hriat tel tur chu Villa-ah hian Chelsea legend John Terry chuan assistant coach hna a chelh mek a, Terry hian indawrna a kalpui a nih chuan Frank Lampard-a'n a captain hlui hi hnar harsa a ti ang. 

Chelsea centre back Antonio Rudiger chu West Ham-in lakluh an beisei nia sawi a awm bawk a, mahse Chelsea hian an midfielder Declan Rice chhuhsakna hmanruaah an hman hlauin an dawr ṭha ngam lo niin an sawi!

European football transfer expert Fabrizio Romano chuan Rice hian Chelsea tana khelh a duh niin a sawi a, Blues hian an bawhzui tak tak a nih chuan Rice hian chhuah dilna a thehluh mai a rinawm hial. 

Rudiger hian Chelsea-ah kum hnih cham turin contract a la nei a, Premier League club hian loan-a chhuahtir ai chuan a contract neih zat thlirin man neia hralh an duh zawk a rinawm bawk.