Pogba a hlim lo, a chhuah a ngai - Mino Raiola

Football agent lar Mino Raiola chuan a enkawl Paul Pogba chu Manchester United-ah a hlim loh thu a sawi a, team thlak a mamawh thu a sawi. French midfielder Pogba hian Old Trafford-ah June 2022 thleng contract a  

nei a ni.

Kum 27 mi Pogba hian West Ham nen an inkhelh ṭumin goal ropui a khung a, he goal bak hi tun season-ah chhuan tur a la nei meuh lo. Juventus midfielder hlui hi Premier League match riatah chauh a la inlan a, vawi ngaah chiah bul a ṭan.

Raiola a lo lang

Paul Pogba agent Raiola hian sulhnu a nei ṭha a, French midfielder chungchangah pawh sawi tur a tam. United manager ropui ber Sir Alex Ferguson nen an inhmuh thiam loh avangin Pogba hian Juventus a pan tia sawi a awm a, a dikna chen pawh a awm.

Tun ṭuma Raiola-a'n ṭawng-kam a rawn lan leh chhan hi Pogba thlavang a hauh vang a ni a, khelhna hmun a chang tam lo hi a lawm lo.

Raiola chuan, "Paul hi United-ah a hlim lo a, hemi vang hian a theihna angin a khel chhuak thei lo. Beisei a pha ṭhin lo. Kum khat leh a chanve contract la nei mah se club leh player tana ṭha ber chu transfer hun inhawn leh hmasak bera hralh a ni," tiin a sawi.

Pogba hian kum 2016 khan pound maktaduai 89-in United a zawm a, Old Trafford-ah hian a theihna angin a la khel chhuak meuh lo.

French midfielder hian October thla khan Real Madrid tana khelh a châk thu a sawi tawh a, France manager Didier Deschamps pawhin,  "A khelh hun emaw a position-ah emaw Paul Pogba tan club-ah lungawi theih a ni lo," tiin Pogba chungchang hi a sawi tawh bawk.

Pogba hi season liam ta khan ke rek hliam vangin vawi 22 chauh inelna hrang hrangah a inlan a, kuminah hmun pawimawh a chang pha lo bawk nen United tan a ṭangkai tawk lo.

Raiola chuan, "Thu khuh kual vel a ngai lo. Thil awm dan hi tlang takin sawi ila, hun khawhral lo ang u," tiin Pogba chu chhuak ngei tura duh thu a sawi. Nizan khan Manchester United-in Champions League inkhel pawimawhah RB Leipzig an hmachhawn a, result kan hre hman lo.