Premier League thirletna Hull hmaah Liverpool an 'pul'

Thawhlehni zan khan Liverpool-in khualmualah Premier League mawng lam team Hull City chu 1-0 in an hneh lo a, season thara Champions League an beiseina a chau tawh hle.

Liverpool-in an chung chiaha awm palina ni mek Manchester United an phak lohna hi point sarih lai a ni tawh a, match li chiah khelh tur a awm tawh thung. Tlak hlau Hull City tan erawh Premier League beiseina a la zuai mai lo, relegation zone aṭanga an himna hi point li niin game li khelh hmabak an la nei a, an hmachhawn tur erawh Premier League team lian tak tak Arsenal, Tottenham Hotspurs, Manchester United leh table mawngphah luahtu Burnley te an ni.

Inkhel chu

KC Stadium-a inkhelah hian Liverpool tan captain Steven Gerrard hmel hmuh tur a awm lo a, ani aiah Joe Allen a tlan lut. Inkhel ṭan aṭanga minute sarihna lekah mual neitu Hull City an hlauhawm nghal a, tunhnaia che ṭha Dame N'Doye chuan ball a tauh hmain Simon Mignolet-a'n a lo man hman hlauh.

Liverpool tan PFA team of the year-a lang pha Philippe Coutinho a hlauhawm a, minute 19 naa a ball pet ṭha tak chu Steve Harper-a'n alo dan per hnu in Tom Huddlestone chuan a lo pet chhuak hman hlauh.

Minute 37 naah beisei loh zawk Hull City-in goal an thun ta nge nge . Michael Dawson chuan a hun takah a hmun takah a awm avangin Liverpool goal-ah a tauh lut a, Liverpool-in an chhanlet theih loh avangin 1-0 in inkhel a tawp ta a ni.

Liverpool tan Mario Balotelli chuan bul rawn ṭan mah se inkhelh chhung zawngin hmuh tur a awm mang lo a, minute 65 naa Rickie Lambert-a'n a rawn thlak hma zawnga a ball khawih fuh zat hi vawi 22 chiah a ni. Raheem Sterling-a'n ni dang a phak lo a, Henderson-a'n a chance neih ṭha tak goal-ah a chan tir thei lo bawk.

Inkhel chhehvel

Liverpool hi kum tir lamah rawn che ṭha viau mah se tunhnaiah an zuih ral a, Premier League game an khelh hnuhnung pangaah vawi khat chiah chak hmel hmu theiin point 15 hlawhchhuah theihnaah point li chiah an hlawhchhuak a ni.

Liverpool defending hi a chhe hran lo. Tun season-ah vawi 14 zet goal an chhuah lo a, anni aia goal chhuah loh ngah zawk awmchhun chu hmahruaitu Chelsea chiah an ni. An striker te'n goal an khung thei lo tih a chiang a, season tharah insiamṭhat an tum a nih chuan 'world class' striker an lei a ngai ngei ang.

Liverpool leh Hull City inkhel hi away team fan-te tana ticket man a to em avangin Liverpool fans ṭhen­khat chuan an 'boycott' a ni.

Eng nge an sawi?

Hull City manager Steve Bruce chuan, "Kan khelh dan en chuan chak kha kan phu zawk a, kan inkhelh chhung zawng khan kan chhaihbuai a ni. Liverpool te ang team ṭha khelh chuan tlar hnung lam phui ṭhat a ngai a, chutiang tak chuan kan khelin ka hria," a ti.

Bruce chuan Premier League-a cham zel a inbeisei thu sawiin, "Ka player-te theihna hi ka ringhlel ngai lo. Theihtawp chhuahin kan khel zel anga, tunhnaia kan khelh dan anga kan khelh reng theih chuan Premier League-ah hian kan cham zel theih ka beisei," a ti.

Liverpool manager Brendan Rodgers chuan, "Goal khung tur khelhin kan khel lo hrim hrim a ni. Ball kan chang tam zawk a, chance pawh kan nei. Mahse, a pawimawh ber goal kan khung miau si lo. Kan tlar hnung a phui ṭha a, an chance neihchhuna goal an rawn khung ta mai kha an vanneih pui a ni," tiin an vanduai vanga chak lo an nih thu a sawi.