Bayern ngam loh Dortmund

Jurgen Klopp chuan a hun hnuhnungah a team te champion nomawi chawi pui ngei a tum a, Thawhlehni zan khan German Cup semifinal-ah Bayern Munich chu penalty shootout-ah 2-0 in a hneh. Pep Guardiola enkawlna hnuai a champion nomawi pathum chawi tum Bayern beiseina pakhat chu an tihtawp sak a ni.

Allianz Arena a inkhelah hian hun pangngaiah 1-1 a an inhnehtawk hnuah hun pekbelh minute 30 chhung khelh chhunzawm a ni a, goal dang a luh theih loh avangin penalty shootout hmanga chak zawk zawn a ni a, Dortmund hi 2-0 a chakin German Cup final an thleng ta a ni.

A vawi 25 na atan a German champion ni hlim Bayern-in goal an khung hmasa a, goal khung tu chu Dortmund aṭanga an lakluh striker Robert Lewandowski a ni. Ani hian minute 29 naah Bayern hmahruaina goal a khung. Season ṭan dawn a Bayern pantu Lewandowski hian a club hlui laka a goal thum a khung na chiah a ni.

Second half-ah Bayern tan inhliam dankawr Arjen Robben a lo lut a, mahse Robben lo luh aṭanga minute sarihna lekah Pierre-Emerick Aubameyang chuan an siphurh sutna goal a thun zui a ni.

Dortmund midfielder Kevin Kampl chu yellow card vawihnih hmuh vangin extra time-ah hnawh­chhuah a ni a, Thiago Alcantara thlaktu Robben chu hun tawp hma minute ruk ala awm tihin hliam dang vang bawkin thlak angai leh, ani aiah hian Mario Gotze dah luh a ni.

Penalty chu

Bayern tan captain Phillip Lahm chuan a pet hmasa ber a mah se field nal vangin a tawlhthu a, a pet goal lo. Ani ang bawk hian midfielder Xabi Alonso chuan a ṭhelh bawk. Mario Gotze penalty pet chu Dortmund goalkeeper Mitchell Langerak-an a lo dansak bakah Bayern goalkeeper Manuel Neuer chuan goal chunglam kham a pet per bawk a, Guardiola naute zingah penalty pet goal an awm lo.

He tih lai hian Dortmund tan Sebastian Kehl leh Ilkay Gundogan te chuan penalty an pet goal thung a, an team te final an hruai thleng. Semifinal lehlama Bielefeld leh Wolfsburg inkhel a chak zawk zawk nen final-ah an inhmachhawn dawn a ni.

Bayern manager Guardiola chuan, "Bayern ka enkawl hnua Dortmund nen kan inkhelh tawhah chuan kan khelh ṭhat ber ṭum ala ni hial ang. Mahse kan vanduaini anih avangin tih theih kan nei lo. Ka naute ka dem lo a, ka chhuang zawk a ni. Dortmund ka lawmpui a, an champion zui ngei theih nan duhsakna ka hlan e," tiin a sawi.

Tun season tawp ruala chhuak tawh mai tur Dortmund manager Klopp chuan, "Zanin chu kan hun a inherchhuakah ka ngai, team pahnih khan kan khel ṭha dun em em a atawpah a vannei zawkah kan ṭang ta hlauh. Kan goalkeeper Langerak khan fak a phu hla. Inkhelh laiin vawi tam tam min chhanhim tu a nih bakah penalty a dang thei a kan chak nana mi pawimawh a ni," tiin a sawi.