Mayweather hneh turin Pacquiao a inringtawk
Nilaini zan khan Las Vegas khawpui chu boruak lian takin a tuam a, a ri hulh hulh. Engdang vang a ni lo, khawvel boxing titi luahtu Floyd Mayweather leh Manny Pacquiao te inhnek hun a hnai tawh a, Nilaini zan khan an inhnekna tur khawpui boxer ropui pahnihin an thlen vang a ni.
Pacquiao-a zam lo
Amah ṭantu tam tak lo pungkhawm hmaah Pacman a ṭawng pawr a, thlamuang taka awm turin a fan-te a chah. Kum 36-a upa Filipino boxer chuan, "Hlauthawng suh u, inhnek tur chu nangmahni ni lovin keimah ka ni. Tunah hian ka phurin chak zawkah ka ṭang dawn tih hi 100% in ka chiang. Tun hi Mayweather-a'n chak loh hmel a hmuhna hmasa ber tur a ni dawn," tiin a zam lo hle.
Mi tam takin chak lo tur zawka an dah chu Pacman chuan a tan a ṭhat zawk thu sawiin, "Ka inhnek dawn apiangin rinkai lo zawk ka ni ṭhin a, mahse hei hian kei chu minti lawm zawk. A chhehvelah ka buai lo tih a tilang chiang a ni," a ti.
Mayweather a zam bik lo, "Ka inpuahchahna a ṭha zawk a, boxer ṭha zawk ka ni. Pacman hi ngaihsam tak ni lo se chuan tun aia boxer ṭha zawk hi a ni ang. Ngaihsam tak chungin vawi tam tak a lo chak tawh a, a ngaihsam vang tho hian 'knock out' a lo ni tawh bawk. Juan Manuel Marquez kan hnek ve ve tawh a, keiin awlsam taka ka hneh laiin ani erawh 'knock out' a ni thung," a ti.
Pacquiao trainer
Roach a pawr
Freddie Roach hian Oscar De La Hoya a enkawl laiin Mayweather a lo hmachhawn tawh a, vawi 47 inhneka a khingpuite tukdawl vektu hi Roach aia hrechiangtu an awm kher lo ang.
Pacquiao trainer Roach chuan, "He inhneka chak ngei tur hian ruahmanna kan nei ṭha em em a ni. Kan 'knock out' thei a nih chuan a lawmawm khawp ang, mahse Manny hi hnek na tak a nih hran loh avangin a harsa ang. Kan innghahna ber erawh chu a chet ranna leh hnek ranna hi a ni a, counter attack a innghat ṭhin Mayweather laka inven dan pawh kan hria a ni," tiin Mayweather chu an hriatchian thu a sawi.
Roach chuan Pacman chu fak nghalin,"Kum 14 chhung chu Pacquiao nen hian kan lo thawkdun tawh a, tun ang reng renga ṭha hian ka la hmu lo. Khawvel pumpui-in he inhnek hi an en dawn a ni tih a hria a, chak ngei a mamawh tihah hian a chiang em em a ni," a ti.
Kum 38-a upa Mayweather chuan Freddie Roach a thusawi hi chhanglet nghalin, "Ka inhnek pui apiangin ruamhmanna an siam ṭhin chu rang taka chet a min hnek nghal char char hi a ni. Mahse he ruahmanna hian kum 19 chhunga vawi 47 ka inhnek tawhah awmzia a nei lo," tiin a ṭawng pawr hle.
American Mayweather chuan, "An ruahmanna hi a ṭhat tawk leh tawk loh chu kan inhnek hunah kan hria ang," tiin a ṭawng pawr hle.
Mayweather chak ringtu Marquez
Mexican boxer ropui an sawi apianga an lam hmasak ṭhin Juan Manuel Marquez hi Mayweather leh Pacquiao lo hnek ve ve tawhtu a ni.
Vawi li Pacquiao inhnek pui tawhtu Marquez chuan, "Pacman hian chak a duh chuan Mayweather hi pressure nasa tak a pek a ngai a, a chet ranna hi chhawr ṭangkaiin vawi tam tak hnek chunga na tak taka a hnek a ngai dawn a ni," a ti. Marquez hian Pacquiao hi vawi hnih hneh lo in vawi khat a inhnehtawk pui a, an inhnek hnuhnun ber kum 2012 khan mipui rin loh takin Pacman hi a 'knock out'.
Mayweather hneh hnu Marquez chuan, "Mayweather hian hmun awl in siam a thiam em em a, a counter-punch hi tawn fuh chuan a na em em bawk. Style danglam tak a neih vangin Mayweather hi chu a chak leh mai ṭhin," tiin Mayweather chu a dah san zawk thu a sawi.
British boxer ropui Ricky Hatton chuan Mayweather hi a chak zawk a rin thu a lo sawi tawh bawk. Pawisa inchawina hmun lamah pawh Pacquiao aiin Mayweather-a'n chak tura ringtu a ngah zawk.
Inhnek hun tur
Boxer ropui pahnih hi MGM Grand, Las Vegas-ah an inhnek dawn a, an inhnek hun tur hi May 2 zanah a ni. Tlai dar 2:00-ah gate hawn ṭan a ni anga, dar 3:00-ah inhnek en tur a awm ṭan ang. Inhnek turte chu;
WBC Super Bantamweight World Champion Leo "El Terremoto" Santa Cruz (29-0-1, 17 KOs) vs. Jose Cayetano (17-3, 8 KOs)
WBO Featherweight Champion Vasyl Lomachenko (3-1, 1 KO) vs. Gamalier Rodriguez (25-2-3, 17 KOs)
Chris "Sweet" Pearson (11-0, 9 KOs) vs. Said El Harrak (12-2, 7 KOs)
Jesse Hart (16-0, 13 KOs) vs. Mike Jimenez (17-0, 11 KOs)
Andrew "The Beast" Tabiti (9-0, 9 KOs) vs. Anthony Caputo Smith (15-4, 10 KOs)
Brad Solomon (24-0, 9 KOs) vs. Adrian Rene Granados (13-3, 9 KOs)
Inhnek tur dangte an inhnek zawhah hian Mayweather leh Pacquiao te hi an inhnek ṭan ve leh anga, zan dar 8:00-ah an inhnek hman tura beisei a ni. An inhnek hun tur leh dar zat tarlan hi local time a ni a, India sanaah chuan Pathianni zing dar 9:30-ah a ni ang.