La Liga Champion rim nam Barcelona
Luis Enrique-a nauten La Liga-ah champion an tum a ni tih lantir nawn lehin Thawhlehni zan khan an mikhual Getafe chu 6-0 in an lo sawp. Champion lai Atletico Madrid lak aṭangin champion nomawi an chhuhsak ngei dawn niin a lang ta.
Barcelona hmatawng pathum Lionel Messi, Neymar leh Luis Suarez te hian tun season chhungin an club tan goal 100 an thun tling ta a, an hnuai chiaha awm Cristiano Ronaldo leh Gareth Bale te tan chuan chetsual a thiang tawh bik lo ang.
Barca super star Messi hian goal 49 a khung tawh a, Liverpool striker hlui Suarez hian goal 21 khung tawhin Brazil captain Neymar-a'n goal 32 a khung tawh bawk.
Inkhel chu
Camp Nou-ah hian table laihawla awm mek Getafe hian point hlawh chhuah beisei in an lenglut. Nikum December khan 2-2 a an lo inhnehtawk tawh avangin point hmuh theih an inbeisei. Mahse, an beiseina neih chu minute 40 chhungin Barca-in an lo tih tawp sak a ni.
Inkhel ṭan aṭanga minute kua na lek a Luis Suarez a penalty hlawhchhuah chu 'cool' tak maiin Messi-a'n goal-ah a chan tir a, Messi hian minute 25-na a Suarez a goal thun tur a siam sak ve thung.
Getafe an insiam rem hman lo, Suarez bawk kan hmu zui a, ani hian Neymar a goal khung tur a siam sak leh a, minute 28-ah Neymar chuan tawih tak maiin Getafe goal-ah a thun ve nghal bawk. Midfielder Xavi chuan Barca goal ngana a khung bawk. First half tawp nan minute nga ala awm tihin Barca-in 5-0 in hma an hruai tawh a, minute 50 dang khelh hmabak la awm mah se chak zawk tur a chiang tawh.
Second half an ṭan leh chauh a Messi leh Suarez te inkawp chuan Getafe tlarhnung an su hawng leh nghal. A hmawr bawktuah Messi ṭangin ani hian minute 47 naah Barca goal rukna leh he inkhel a goal hnuhnung ber a khung.
Tunhnuai ah Barca hi an khel ṭha tluang hle a, an match hnuhnung 15 aṭangin vawi 15 hnehna changin vawi khat chauh an khingpui te an inhnehtawkpui a ni.
Barcelona manager Luis Enrique chuan, "Goal tam tak kan khung chuan a nuam a, kan inkhelh leh tur atan phurna leh inrintawkna min pe ṭhin a ni. Match li khelh tur kan la nei a, team ṭha tak tak vek an ni. Atletico Madrid kan la tum dawn avangin kan dinhmun hi ala him lo a, inthlahdah hman kan la ni lo," tiin a sawi.