Chennai an vannei

Thawhlehni zan khan India Premier League inkhel hmuhnawm takah Chennai Super Kings leh Kolkata Knight Riders te an inkhel a, mual neitu Chennai in run hnih lekin hnehna an chang.

MA Chidambaram Stadium, Chennai-a inkhelah hian Chennai an bat hmasa zawk a, an batsman zingah che ṭha fal an awm lo. Run siam hnem ber Faf du Plessis chuan ball 29 a hmachhawnah run 29 a vawchhuak a, hei pawh hi a chhuanawm hran loh hle. Over 20-ah Chennai in run 134 an vawchhuak a, mi paruk an hloh.

Kolkata Kngiht Riders in an target hi awlsam takin an umpha mai dawn emaw tih hnuah Chennai tan an bowler Dwayne Bravo a 'che' a, West Indies fast bowler hian run 22 chiah pe in wicket thum a rawn la. Kolkata in over 20-ah run 132 vawchhuakin mi pakua an hloh a, run hnih leka an target umpha lo in chak lo zawkah an ṭang ta a ni. Kolkata tana run siam hnem ber Robin Uthappa chuan ball 17 a hmachhawnah run 39 vawchhuak mahse a team a chhanhim zo ta chuang lo a ni.

Zanin dar 8:00 hian Kolkata khelmualah Chennai Super Kings leh Kolkata Knight Riders te hi an inkhel leh dawn a ni.