Chelsea 'team thar' kan hmu ta Player manto Havertz-a'n hattrick a siam

Chelsea tan defender tawn-hriat nei ṭha Thiago Silva-a'n bul a ṭan a, Frank Lampard-a hoten football a mawi theih dan berin an khel chhuak. Pound maktaduai 71 man Kai Havertz-a'n hattrick a siam a, London club-in Barnsley 6-0 in an sawp.

Blues hian Tottenham leh Leyton Orient chak zawk an hmachhawn leh dawn. League Two club player ṭhahnem tak an positive avangin Spurs leh Leyton te hi an inkhel thei lo a, team pahnih chungchang hi ngaihtuah mek niin he thuziah thleng hian thutlukna a la awm lo.

Zaithiam lar Bon Jovi-a'n Chelsea-a a hun tawn phuah-chhuahna hla 'Midnight in Chelsea' ah chuan mi tin an buai avangin ngaihsaktu pawh a neih loh thute a sawi lang. Nilaini zanah Bon Jovi hian London-a hmun pakhat hi tlawh nawn leh ta reng pawh ni se Chelsea inkhelh zan a nih miau avangin chhawntu ṭha a neih a rinawm loh.

Chutihrualin Chelsea FC ṭantute tan chuan zan chhin-chhiahtlak a ni a, "Zan duhawm tak tak la thleng tura atana hmasa ber," tiin Frank Lampard-a'n inkhelh banah a sawi a, an khelh dan enin a thusawi ṭawmpuitu an tam khawp ang.

London club tan hian Tammy Abraham-a'n bul ṭanin English striker hi Havertz-a goal thum khungnaah a inrawlh vek. Second half-ah Ross Barkley leh Olivier Giroud ten an khung belh. Chelsea-in goal ruk an khung a, Brazilian defender Thiago Silva leh English wing back Ben Chilwell te inlan zanah goal an chhuah lo.

Chelsea-in an match hnu-hnung berah Liverpool 2-0 in an hneh lo a, Premier League champion an hmachhawn zawhah hi chuan sum hmang tam London club an zuai hle. Lampard-a'n Championship club Barnsley hmachhawn turin player pariat zet a thlak a, hahchawlh tir zingah Reds laka khel ṭha ber Timo Werner pawh a tel.

Match hmasa pahniha chesual keeper Kepa Arrizabalaga aiah Willy Caballero a rawn lut a, defender Thiago Silva-a'n tlarhnung rawn hoin rawlthar beiseiawm Callum Hudson-Odoi leh Abraham te'n bul ṭanin player manto Kai Havertz pawh insiamṭhatna hun pek a ni.

Minute 19-na lekah Blues-in Barnsley tlarhnung fimkhur loh leh Abraham fin zar zoin English striker hian goal hmahruai a khung. Chelsea hian minute 28-naah an khung belh a, hei erawh a class takzet. Mason Mount-a pass chu Abraham-a'n dummy-in Barnsley defender venna hnuaia tal put Havertz-a'n Blues tana a goal hmasa ber a khung.

Second half-ah Barnsley an insiam ṭha lo, tlarhnung aṭanga ball in pass chhuah an tum avangin an tisual nawn. Ball per changtu Barkley-a'n minute 49-naah box chhung chiah aṭangin ṭha zetin a pet goal.

Chelsea midfielder Mateo Kovacic-a'n Barnsley defender ball chhuhsakin vei lam aṭangin a cross a, Abraham-a'n kheng zeuhin Havertz-a'n a pet goal. German midfielder goal hmasa ang thoin minute 55-naa goal luh dan hi a mawi hle. 

Minute 65-naah Barkley-a pass chu Abraham-a'n vawi khatah pet nghalin Havertz-a'n um lutin keeper a bum hnuah hattrick a siam a, Chelsea player-te'n Barnsley tlarhnung an ṭhiat chiang hle. 

Goal rukna khungtu chu tu dang ni loin Olivier Giroud a ni a, minute 83-naah subsitute Ben Chilwell-a cross chu Abraham thlaktu Giroud-a'n dive chungin a tauh goal. Chelsea 6-0 in an chak a, an player lei tharte an dam chhoh tawh bawk avangin Blues hmabak a êng chho hle.

Chelsea manager Frank Lampard chuan, "Kan fitness avang te, kan khelh dan phung thar avangtein kan duh angin tun season-ah kan la khel lo. Tunah erawh kan duh dan ang chu kan hmu ṭan a, zanin hian mimal theihna bakah team anga kan tih theihte kan hmu a, kan khelh danah ka lawm hle," tiin a naute a fak.

Hattrick siamtu Havertz chungchang sawiin Lampard chuan, "Kai Havertz hian season ṭan hmain kan bulah training a nei tam tawk lo a, match hmasa pahnihah harsatna a tawk. Barnsley nen erawh ball tel leh tel loin a khel ṭha em em a, goal thum a khung bakah Barkley-a'n goal khung theih nan a tackle ṭha a, Tammy Abraham nen an inthlawp ṭha bawk," tiin German attacking midfielder 

a fak.

Thiago Silva-a'n minute 60 chhung a khel a, Brazilian defender chungchang sawiin Lampard chuan, "An ṭawng ka thiam lo a, chuti chung chuan harsatna a awm lo. A chhan chu a rawn awm ve ringawt hian training-na leh match-ah a danglam a, midang tan entawn tur a hnutchhiah," tiin a dah sang hle.