I League Second Division Top of the table clash : Aizawl FC Vs Lonestar

Mizoramin I League club nei turin match li chauh a mamawh thei a, kum tam tak nghah a la ṭul thei bawk. Chawhnu dar 2:00 hian PTC Stadium Dergaon-ah hmahruaitu Aizawl FC leh an hnuai chiaha awm Lonestar Kashmir FC te an inkhel dawn a, an inthlauhna hi point thum chauh niin match khat leka chinfel theih a ni.

Bokakhat Stadium-ah Chanmari FC-in I League beseina chawi nung zel turin United SC an hneh ngei a ṭul. Chhiarkawp dan chuan panganaa awm United SC pawhin khelh chhan an la nei a, amaherawhchu an khelh tawhna aṭanga thlir chuan palinaa awm Mohammedan SC pawh tling thei tur zing aṭanga hmuh hmaih a sual tawh lo ang.

Intawnna hmasa

SSB Ranidanga, Siliguri-ah March 29 khan Aizawl FC-in I League Second Division an khel tawh a, an bul ṭan ṭhat ber ṭum tawngin tawnhriat nei tlem Lonestar Kashmir FC chu 4-1 in an hneh.

Result aṭanga thlirte chuan Lonestar hi team tenau takah an ngai a, amaherawhchu inkhelh ṭan tirhah Aizawl FC hian an ngam lo hle. Chumai bakah Lonestar hi Chanmari FC che ṭha lai hnehtu kha a ni.

A eng zawngin

Aizawl FC hi an chak zo ta lo a nih pawhin match hmasa bera 4-1 lawiha an chak kha an ṭangkaipui thei tho, head to head en tur a nih dawn avangin MPL3 champion hian Jammu and Kashmir club hi an hnehna hmasa aia an insawp tir a nih ngawt loh chuan table-ah a chung zawkah an awm tho ang. Result duhawm lo a thleng a nih chuan Chanmari FC puihna an mamawh ang, MPL2 champion hian Lonestar Kashmir hi May 9 khian an match hnuhnung berah an hmachhawn dawn.

Aizawl FC-in Golaghat-ah bul an ṭan ṭha lo nachungin Assam-ah hian Siliguri-a che ṭha lote an rawn langsar a; Michael Lalremruata, Laldampuia leh William Lalnunfela te'n goal an khung hi team tan lawmna tham a tling a, Alfred Kemah Jaryan-a'n goal hmangin innghahna tlak a ni tih a lantir zel bawk.

Aizawl FC-in match 10 an khelh tawhah match khatah chiah goal an chhuah lo a, hemi ṭum hi point khat chiah an hlawhchhuah ṭum a ni. MPL3 champion hian tlar hnung an rem phui a ṭul tawh takzet.

Lonestar tan Ajay

Punjabi tlangval, JCT youth system chhuak Ajay Singh hi Aizawl FC-in an dah ṭhat a ṭul. Ajay hi JCT, Pailan Arrows, Churchill Brothers leh Mohammedan SC tan a khel tawh a, I League Second Division-ah goal khung tam ber a ni.

Punjab forward hian Golaghat-ah match thum khelh tawhah goal nga a khung a, Siliguri lama a goal nga khung nen goal 10 a khung tawh. Goal ruk khung tawh Nigerian forward Christopher Chizoba nena an inkawp tur hi dan a awlsam dawn lo.

Point thum duh Mala

Aizawl FC coach Mala chuan, "Point thum hlawhchhuah kan tum a, draw kan la sawi ri lo. Rozama hi hrem vangin a khel thei dawn lo a, tlar hnungah Emma kan hmu leh tawh ang. Lonestar hi kan huphurh lo a, kan hneh ngei ngei ang erawh kan ti ngam lo," tiin inkhel tur chungchang a sawi.

Beisei nei Chanmari

Chanmari FC-in point ruk ngawtin Aizawl FC pha lo mah se I League beseina nei lo tawp an ni lo. An chunga awm Aizawl FC leh Lonestar Kashmir FC an la hmachhawn dawn a, an hmabak match li ah an chak theih chuan Chanmari tan I League kawngkhar a la in hawng reng.

Chanmari FC hian vawiina an hma­chhawn tur United SC hi Siliguri-ah 5-1 in an sawp a, khami ṭuma goal khat ve ve khungtu Malsawmfela leh F. Lalrinpuia te hrem vangin an khel thei dawn lo.

Chanmari FC coach H. Vanlalthlanga chuan, "Sawmfela leh Valpuia te chu kan mamawh a, chutihrualin kan squad a lian ve bawk alawm. Hahchawlhna hun ṭha a ni ve mai. Tunah chuan team chhe vak hi an awm lo a, kan tan chuan chet fuh loh a thiang tawh lo. Kan theihna zawng zawnga kan khelh a ṭul a ni," tiin a sawi.