Dr T Ao Football Assam lakah Mizoram beiseina thamral
Champion lai Mizoram chu Dr T Ao Memorial Northeast Football Championship semi final-ah an tla. Thawhlehni zana Guwahati-a semi final-ah a thlengtu Assam-in 2-0 in an hneh.
Vawi hnih champion tawh Mizoram hian second half-ah goal hnih an chhuah a, final an lut ta lo a, Assam leh Manipur-in final an khel ang. Hetihlai hian Mizoram hian pathumna inchuhah May 1 hian Nagaland an hmachhawn ang.
Semi final-ah hian Mizoramin bul ṭan ṭha zawkin a tir minute 10 chhungin clear chance vawi hnih an hmu. Mahse, a pawimawh ber goal erawh an khung thei lo a ni.
Mizoram lam hin an vanduai hle a, Mizoram Premier League season 1 best player R. Laldanmawia chuan Assam goalkeeper chauh a hmachhawn tawhah goal a khung lo bawk a ni.
Second half minute 17-naah Assam lamin hla tak aṭangin an pet goal a, he mi hnu hian Johny Lalfakzuala'n goal post a pet per a, Fakzuala'n bar tihper leh bawk. Mizoram hian sût ngei tuma an nawrna lamah tlarhnung an veng phui lo a, hun tawp dawnah goal an chhuah leh a, Assam hi 2-0 in an chak.
Coach HC Zarzoliana chuan, "Fakzuala leh Danmawia an vanduai a ni. Fakzuala'n keeper chiah awm tawhah a thun lo a, Danmawia'n keeper awm loh hnuah a pet over bawk a, kan vanduai ṭum a ni e," a ti.
Manager Lalṭanpuia Hnamte chuan, "Kan khel chhe hran lo a; nimahsela a khelhah hrim hrim Assam an ṭha hret zawk a, goal chance erawh akn inngah hleih hle. Anni lamin chance hnihah vawi hnih an thun a, keini lamin thun ngei theihna vawi nga tal chu kan nei a, kan hlah vek a ni," a ti.
Mizo player ṭha 40 rual vel I League Second Division khelin an zin chhuak a, Mizoram hi an ṭhat theih dan berin an inrem thei lo a; Assam lakah an tlawm ta a ni. Mizoram hian Manipur record tluk pha turin hun rei zawk an la mamawh dawn a ni.