Chelsea-ah Mendy a lut ta

Premier League champion beiseia inthuamṭha mek Chelsea chuan transfer bazar-ah thawm an neih belh zel a, Rennes goalkeeper Edouard Mendy chu pound maktaduai 22-in an lalut. 

Kum 28 mi goalkeeper hian Blues tan kum nga chhung khel turin contract a ziak a, "Chelsea ka zawm thei hi ka lawm takzet. He squad zawm theih hi ka tan chuan mumang ram ang mai a ni," a ti. 

Chelsea hian khawvela goalkeeper manto ber  Kepa Arrizabalaga an kawl mek a, pound maktaduai 71 man keeper hian tihsual neih a chin avangin Mendy lakluh hi Blues tan chuan thawk huaina tham a ni. 

Senegal tana vawi riat inlan tawh Mendy hi tun nipui transfer a Chelsea player lakluh pariatna a ni a,  Blues hian tun nipui bikah ringawt player lakluh nan pound maktaduai 220 chuang an seng tawh!

Chelsea legend tia chhal ngam 

Petr Cech khan Rennes aṭang thoin Blues hi kum 2004 khan a zawm a, Chelsea ṭantute chuan an club technical & performance advisor ni zui ta Cech ang thoa hlawhtling turin Mendy hi an beisei ang. 

London club director Marina Granovskaia chuan, "Peter Cech leh kan technical team ten Edouard hi kan squad neihsa zawm tura an goalkeeper duh ber a nih thu an tihchian hnu kha chuan khaw dang kan hawi thei tawh lo a ni," a ti a, an duh tak goalkeeper an chan theih thu a sawi.