Netherlands coach thar Frank de Boer

Netherlands chuan coach atan Frank de Boer an lakluh thu Nilaini khan an puang. Ajax manager hlui hian kum hnih daih contract a ziak a, Ronald Koeman hmunruak kalsan a hnawhkhat dawn. 

Kum 50 mi Frank de Boer hian an ram team hi Qatar-a nghah tur 2022 World Cup thleng a enkawl ang a, chutihrualin nakkuma khelh tur European Championship zawhah an khelh dan ennawn a ni dawn.

Dutch Football-a thuneitu sang KNVB chuan vawiin hian media hmaah De Boer hi an pho chhuak ang a, Oranje a enkawl hmasak ber tur chu October 7-a Mexico nen friendly match an khelh hunah a ni ang. 

De Boer hian Netherlands national team-ah assistant coach hna a lo chelh tawh a, 2010 World Cup-a final an thlen ṭum khan coach Bert van Marwijk puitu a ni. Hemi hnu hian a chawr chhuahna Ajax chu kum ruk chhung enkawlin Eredivisie nomawi vawi li a chawipui. 

Netherlands hi 2014 World Cup-a pathumna an nih hnuah World Cup leh European Championship-ah an inpet tling zo lo a, Barcelona pan ta Ronald Koeman-a hnuaiah harhtharna an chang.

Koeman-a kaihhruaina hnuaiah Euro C'ship khel turin an inpetling tawh a, UEFA Nations League hmasa berah final an thleng bawk. Amah-erawhchu Koeman awm loh hnuah an tlahniam hret niin a lang a, Poland 1-0 a an hneh hram bakah an mualah Italy lakah 1-0 in an tlawm bawk.

Bert van Marwijk chuan, "KNVB hian national coach naupang an duh a, hmabak thui tak an thlir a nih chuan Frank hi duhthusam a ni. Frank hi player-te nen inkungkaihna a nei ṭha a, a ṭul a nih chuan thuneihna lekkawh a hreh lo ang," tiin a pu hlui a rin thu a sawi.

Chutihrualin Netherlands international hlui Rene van der Gijp chuan, "Khawi ram mahin club pathum ban hnu hi an duh lo ang. Germany leh France-ah phei chuan a thleng thei lo hrim hrim," tiin a sawisel thung. De Boer hi a club enkawl hnuhnung pathum Inter Milan, Crystal Palace leh MLS club Atlanta United ten an ban vek.