Australian legend Dean Jones a thi

Cricket khawvela hming dai tawh ngai lo tur Dean Jones chu nimin khan Mumbai khawpuiah lungphu chawlin a thi a, Australian cricket legend hi kum 59 mi a ni. 

Kum 2019 a Australian Cricket Hall of Fame-a lakluh Jones hian inkhelh a chawlhsan hnuah commentary lam a luhchilh a, UAE a Indian Premier League khelh mekah pawh Star Sports commentary team-ah telin Mumbai aṭangin commentary hna hi a thawk. 

Jones hian player a nih laiin Australia tan test match 52 khelin run 3,631 a siamsak a, century vawi 11 vaw chhuakin a run siam hnem berah run 216 zet a siam thei a ni. Australia tan hian ODI-ah match 164 khelin run 6,068 a siam hman a, vawi sarih century siamin vawi 46 zet chu 50 a vaw chhuak bawk. Jones hian NDTV-a 'show' a neih ṭhin 'Prof Deano' chu a larpui viau a, inkhelh a chawlhsan hnua media lama a sulhnu avang hian India ramah chuan hriat a hlawh hle.