Brighton aiin Saints vannei zawk

Thawhṭanni zan Premier League inkhelah Southampton chuan Brighton 2-1 in an hneh a, Danny Ings-a'n chakna goal penalty aṭanga a khung an hlawh chhuah dan chuan sawi zui a hlawh hle.

Season bul ṭan fuh Saints hian match 11 an khelh aṭanga point 20 hmuin pangana dinhmun an luah, hmahruaitu Tottenham an phak lohna chu point nga chauh a ni. Brighton erawhin point 10 chauh an la nei a, 16-naah an awm.

Falmer Stadium a inkhelah team pahnih an inhnehtawk viau. Minute 26-naah Saints captain James Ward-Prowse chuan handball vangin penalty a chawi a, midfielder Pascal Gross-a'n goal hmahruai atan a chantir.

Chawlhlawk an hman hma deuhin Ward-Prowse chuan a tihsual hliah khuh nan ṭha takin corner a pet a, defender Jannik Vestergaard chuan an si phurh sut nan goal kilah chiang takin a tauh lut zawt.

Team pahnihin an hun ṭha neih an chhawr ṭangkai zui thei lo a, point khat ve ve insemna an lungawi a ngai dawn niin a lang hman. Mahse, minute 81-naah Saints lamin penalty an hmu a, striker Ings chuan chakna goal atan a khung.

Southampton defender Kyle Walker-Peters-a'n a through ball hmuh chu Seagulls box lamah a tlan pui a, box a luh hma chiahin Brighton wing-back Solly March-a'n a lo nek tlu. Box pawna nek tlu ni mah se tlan laklawh a nih avangin a chhungah a tlu lut.

Referee David Coote-a'n freekick a pe a, ball dahna tur pawh vanishing spray hmangin a thai kual hman. Mahse, video assistant referee hman a ni a, kil hrang hrang aṭanga an endik hnuah penalty an pe leh hnuhnawh.

Penalty chawitu March-a chuan, "Football khel ngai loin thutlukna an siam ni awm tak a ni, hetiang hi chu thluak tel lo khawl hmanga thutlukna siam chawp mai niin ka hria," tiin VAR thutluknaah a lawm lo hle.

Brighton boss Graham Potter chuan, "Chak taka an tlan laia thil thleng a ni a, innekna hmasa kha box pawna thleng ni mah se a chhungah pawh khan inbakkaihna a awm zui ni ngei chuan ka hria. Khami chungchang kha an hmu zawk niah ka ngai," tiin penalty chungchang a sawi.

Southampton boss Ralph Hasenhuttl chuan, "Ka nauten tih fuh loh leh dik tawk lo an nei nual, chuti chung chuan point thum hlu tak kan hlawh chhuak thei a ni. A bik takin goal nawr kawngah zir belh tur kan la ngah.

"Penalty hmasa zawk kha ka lo hmu lo, a hnuhnung zawk erawh VAR an hmang kha thil awm tak a niah ka ngai. Thil thleng kha a nihna tak kan hriat theih nan chuan VAR hi a pawimawh reng a ni," tiin a sawi.