Liverpool tan fiahna hmasa - an hmaah Chelsea!

Pathianni zan dar 9:00 a lo ni ang a, inkhel hmuhnawm bik en tur kan nei dawn - inkhawm duh tan pawh inkhawm ban nuam tawk hun vel a ni a, Premier League hmahruaitu Liverpool khelmualah Chelsea an leng dawn.

Liverpool-in table chung ber luah mah se, an elpui fans tam takin rin an harsat a, pundit ṭhenkhat pawh an bang chuang lo. "Team ṭha an la tum hleinem," an ti a, Old Trafford-a 3-0 ngawta Manchester United an sawp pawh tun dinhmuna Red Devils dinhmun avangin an dahsansak duh lo.

Arne Slot leh a naute tan Pathianni zan inkhel hi anmahni ringhleltute chhanletna hun ṭha a ni a, Anfield-ah Enzo Maresca hoa leng tur Chelsea hi an lo nau chei thei a nih ngat chuan ringhleltute laka chhanna ṭha tak a ni dawn.

Reds hian rin loh taka Nottingham Forest an ngam loh hnuah, inelna hrang hrangah match ruk an khel leh tawh a, an chak vek! Blues lakah pawh an inringtawk ang tih a chiang a, Chelsea tan fimkhur a ṭul dawn.

Fiahna chu

Liverpool hian ni 21 chhungin match sarih ngawt khel tur an nei dawn a, a zin kual hun chhung nena chhut phei chuan an fixture a 'tight' takzet a, lungngaihna belhchhah turin club ṭha deuh ṭhiau an hmachhawn dawn!

Chelsea zawhah Nilaini zan hian Champions League-ah RB Leipzig an hmachhawn zui dawn a, October 27, Pathianni zanah Arsenal an lenchilh zui ang - Brighton & Hove Albion (league & Carabao Cup), Bayer Leverkusen leh Aston Villa ten an zui dawn.

A tawi zawnga sawi chuan Liverpool hmabak a hautak takzet a, tuna hmahruaitu hi December a hnaih meuh chuan top four-ah pawh an awm lo mai thei. Mahse, coach Arne Slot erawh a zam lo a, fixture hautak chu chhuanlamah hman a tum lo.

Dutch coach chuan, "Champions League leh Premier League match hautak khelh kawp a ngai a nih pawhin thil nih phung ve reng alawm - kum hnih liam ta khan inelna pahnih khelh harsatzia kan hmu a, season hmasa khan Manchester United pawh an talbuai hle. Tun hnai season hniha inelna pahnih ṭha taka khel thei chu Manchester City leh Arsenal chiah an ni a, chutianga kan tih hun chu a thleng ve ta," a ti.

Fiahna = Chelsea?

Chelsea-in coach thar Enzo Maresca hoin season an hmachhawn a, a tam zawkin rinhlelhna mit nen an thlir. Mahse, London club an vanduai a, an league match hmasa berah champion lai Manchester City hmachhawn nghalin, 2-0 in an tlawm.

Nipui transfer-a player la lut nasa Blues-in dem an hlawh nghal a, mahse, Maresca hian a duh dana team khelhtir turin hun a mamawh rei lo hle. City laka an tlawm hnuah league match ruk khel leh tawhin, tlawm an nei miah lo!

Conference League lamah playoff paltlangin, league round an inpetkai a, an match hmasa berah Gent chu 4-2 in an hneh nghal. League Cup-ah pawh Barrow chu 5-0 ngawtin an sawp a, a tira rinhlelhna kha rinnain a thlak ta.

Pathianni zanah pawh Liverpool tan fiahna an tling dawn tih a chiang a, club pahnih intawng tur hi en a châkam ta takzet - Blues hian point li chauhin hmahruaitu Liverpool hi an phak lo mek.

An kim lo

Liverpool tan hliam vangin goalkeeper chhuanvawr Alisson a inlan thei dawn lo a, Reds keeper inlan thei lo tur hi Chelsea tan thu lawmawm a ni ang - London club hian goal khung nuam ti Cole Palmer, Christopher Nkunku, Noni Madueke leh Nicolas Jackson an nei tih theihnghilh lo la.

Alisson awm loh hlana si ban nghak turin Reds hian Caoimhín Kelleher an nei a, mahse, international break-ah Liverpool keeper hi Ireland tana inlanin a chesual a, Blues laka inrintawkna nei lehnghal turin rilru paukhauh a ṭul ang.

Hriat tur erawh Chelsea an kim bik lo. Tlarhnungah player pawimawh pahnih Marc Cucurella leh Wesley Fofana te chu hrem vangin an inlan thei dawn lo a, goal khung thiam Liverpool lakah fimkhur a ṭul dawn.

Liverpool hian tlarhmaah goal khung bansan thei lo Mohamed Salah, Luis Diaz, Diogo Jota, Cody Gakpo leh Darwin Nunez te ho an nei a, Chelsea lakah goal khung inthlahrun an tum lo ang.

Khaikhinna: Salah vs Palmer

Liverpool leh Chelsea ten team ṭha tak an nei ve ve a, kil tinah player man to leh hlawh hnem rual hmuh tur an awm - chutiang karah pawh chuan player langsar bik, mipui mit fukna an awm ṭhin a, Pathianni zanah pawh Mohamed Salah leh Cole Palmer te chu en bik hlawh tur an ni ang.

Reds tana Salah ṭangkaizia inhrilh nawn a ngai lo a, mi tam tak chuan Jurgen Klopp-a hnuaia Liverpool dintharna kawnga player pawimawh berah an ngai hial ang - hnial harsa tak tur a ni.

Kum 32-ah pawh Salah hi Reds tan player langsar bera chhal ngam a la ni reng a, season a hmang ṭha hle. Egyptian forward hian league match sarihah goal li a khung tawh a, assist vawi li a nei tawh - goal riat a thawk chhuak leh der tawh!

Pathianni zanah pawh Salah hi Chelsea tlarhnung tan ven bik tur a ni dawn a, Salah ringawta an rilru an sen chuan anmahni hrem turin league match sariha goal nga leh assist vawi khat nei tawh Luis Diaz, league match ruka goal hnih leh assist vawi hnih nei tawh Diogo Jota a awm bawk - bench-ah Cody Gakpo leh Darwin Nunez an la nei cheu dawn.

Chelsea tan erawh Cole Palmer chu Anfield-a an hmachhuan tur a ni. English attacking midfielder hian league match sarihah goal ruk khungin, assist vawi nga a nei tawh a, Anfield ngeia Reds fan-te ngawihtir hi a tan duhthusam a ni ang.

Kum 22 mi Noni Madueke pawh a puitling ta hle. League match rukah goal li a khung tawh a, season hmasa Premier League match 23-a goal nga a khung chu goal khat chiahin a phak lo tawh!

Manchester United duh loh Jadon Sancho pawh Chelsea-ah chuan a tlangnel viau a, match liah assist vawi thum a nei tawh. Nicolas Jackson hian sawisel hlawh ṭhin mah se, match sarihah goal li leh assist vawi thum a nei tawh tih theihnghilh lo la!