Man United-ah Ten Hag a cham zel dawn em?

Manchester United chuan zanin dar 7:30 hian Old Trafford-ah Brentford an mikhual dawn a, Bees laka an chak lo a nih chuan Erik Ten Hag an ban dawn nia sawi thawm a awm. Dutch manager hi an ban a nih chuan lak theih tur zingah Brentford manager Thomas Frank hming a ri tel a, hei vang hian zanin inkhel tur a pawimawh hle.

Premier League-a sulhnu nei ṭha ber Manchester United hi table-ah 14-naah an awm mek a, champion aiin relegation zone an hnaih zawk. Tun season match sarih khelh tawh aṭangin vawi hnih chauh an la chak a, vawi nga chauh goal la khungin point riat chauh an la hmu.

Kar liam ta khan manager chungchangah club thuneitute an ṭhu khawm a, Ten Hag-a chunga rinna nghah rih an la duh. Football transfer chungchanga journalist hre bik Fabrizio Romano chuan, "Ten Hag hian Man United thuneitute aṭangin a dinhmun chungchangah inbiakna an nei lo a, kar liam ta a ni emaw tun karah pawh ni se ban tumna an la nei lo. Manager chungchangah buaina an nei chiang a, mah se tun hnai maia thlak danglam tur niin a lang lo," tiin a sawi.

Dutch manager tan Man United enkawl chhunzawm hi thil theih a ni mah se Old Trafford-a thuneihna vuantu ni reng tur chuan insiamṭhat ran a ṭul hle. Bees laka an khelh dan hian a hmalam hun thui tak a la hril ang.

Ten Hag-a tana harsatna belhchhah turin player pawimawh Kobbie Mainoo a inhliam a, kum 19 mi midfielder hi a chawlh rih a ṭul dawn. Tun ṭum international break-ah pawh Mainoo hi inhiam vangin ram tan a inlan thei lo a, squad aṭang pawhin a inhnukdawk.

Mainoo bakah Harry Maguire, Mason Mount leh Luke Shaw te chu hliam vang thoin an inlan thei dawn lo. Chuithrualin Man United tan chanchin lawmawm a awm a, Alejandro Garnacho (khup) leh Amad Diallo (damlo) ten training a awm leh tawh. Noussair Mazraoui pawh ram tana inlannaah lung lam fel loa sawi ni mah se training a zawm leh tawh bawk.

Erik Ten Hag-a hote hian match ruk chhung chak hmel an hmu tawh lo a, Bees lakah chak ngei an tum dawn. Premier League bikah match hnuhnung pathumah goal an khung lo a, Bees laka hnehna chang turin goal khungtu an mamawh dawn a, Rasmus Hojlund emaw Joshua Zirkzee emaw goal hmaah an hriam hret a ṭul ang.

Bees hian United aiin season bul an ṭan ṭha zawk a, an match hnuhnung berah pawh Wolves 5-3 in an hneh. Old Trafford-ah mikhual team an che ṭha ṭhin a, Thomas Frank hote pawhin result ṭha an beisei ang.