G.I.G Motors Inter Village Football Player endik nan voter ID hman a ni dawn

G.I.G Motors Inter Village Football Tournament 2024 chu November hian khelh a ni dawn a, entry fee hi October 28, Thawhṭanni tlai dar 4:00 thleng a pek theih. Entry fee hi Rs 2000 hi phone number 9862560134-ah GPay hmangin a pek theih a, MFA Office, City Park Aizawl leh LM Store, Bawngkawnah entry fee hi a pek theih bawk.

Player chu a khua/veng nghet (permanent address) ah a khel tur a ni a, a awmna nghet (permanent address) LC/VC an tel lo a nih chuan a awm lailawkna (present address) veng/ khuaah a khel thei ang.

Player-te awm nghehna (Permanent address) en nan hian EPIC hman a ni ang a, EPIC nei lo chu Adhaar Card/Ration Card hmanga endik a ni dawn. Player inchuh buai a awm a nih chuan player duhthlanna a ni ang.

MFA-in veng/khua inelna a buatsaih hnuhnung ber chu LBS All Mizoram Inter Village Football Tournament 2022 kha a ni a, Covid-19 zawh hnua inelna buatsaih a nih bawk avangin Mizoram pum a deng chhuak hneh hle.

Inelnaah hian team 204 telin June 24-July 19, 2022 inkar khan neih a ni a, inkhel vawi 203 awmin goal 1,016 a lut. Aizawl District chuan team thawh hnem berin team 103 an thawh a, Mamit-in team 26 zet an thawh ve bawk. Kolasib (19), Serchhip (15), Saitual (13), Champhai (8), Khawzawl (8), Lawngtlai (6), Hnahthial (3), Lunglei (2) leh Siaha (1) ten team an thawh vek bawk.

Aizawla neih inelnaah Aizawl khaw team pahnih an final a, Champhai Kanan chuan Sialhawk hnehin champion nomawi an chawi a; Champhai Kanan player ṭhahnem takin eizawn nan football an hmang zui a ni.