Balotelli-a'n club thar a nei

Manchester City leh Liverpool striker hlui Mario Balotelli chuan Serie B club AC Monza a zawm, thla nga chhung ngawt mai club nei loa a awm hnuah khelhna tur club a nei ve leh ta. 2020-21 season chhung atan contract a ziak.

Kum 30 mi Balotelli hi season hmasa khan a khelhna Brescia nen an inṭhaṭhen a, a club hi an tlahniam zui. Serie B club Monza a zawm avangin a club hlui nen hian an inhmachhawn thei ang.

Monza hian Totten-ham midfielder hlui Kevin Prince-Boateng an nei tawh bawk, tun dinhmunah table-ah pakuana an luah mek. Balotelli an neih avangin beisei an nei sang dawn.

Balotelli hian theihna a nei sang, AC Milan leh Inter Milan tan pawh a khel tawh. Inter tan hian Champions League, Serie A, Coppa Italia leh Italian Super Cup pawh a chawi hial.

Theihna nei sang tak ni mah se a nungchang ṭha lo vangin a thlen san tur angin a thleng sang tawk lo. Ligue 1 club Nice leh Brescia phei chuan a contract neih lai pawh hmang zo loin an chhuahtir hial a ni.