Saka leh Havertz dinhmun a ṭha - Arteta

Arsenal manager Mikel Arteta chuan a player dulai Bukayo Saka leh Kai Havertz te dinhmun a ṭha tih a sawi, hetih lai hian captain Martin Odegaard erawh zanin dar 10:00 a Bournemouth an lenchilh hunah a la inlan thei dawn lo.

England tana a fehchhuahna lamah Saka a inhliam a, hei vang hian an match hnuhnung zawkah pawh a inlan lo. Arteta chuan, "Ram tan match pahnihna khel tur kha chuan a taksa in a tlin lo, chutihrualin tun hnai ni hnih chhungin a dinhmun erawh a ṭha.

"Team training a rawn zawm tirh chuan midang aiin la ti nep deuh, a vawi hnihnaah erawh a dinhmun a ṭha," a ti. Saka hi a dam a nih phawt chuan Arsenal tan a inlan zel a, zaninah pawh mual hmalam sirah bul a ṭan leh ang.

German forward chungchang sawi zuiin Arteta chuan, "A khelh dan hmang kan thlak a, tlarhma laiah a khel tamin mamawh hunah pawh hnun a ni fo bawk. Club chauh ni loin ram lamah pawh dinhmun pawimawh a luah, chuvangin German lam nen pawh kan inbe pawp reng.

"Goal khung chauh a ni lo, khelmual chhunga a hnathawh hi a ṭangkaiin a ṭhahnem ṭhin hle. Inkhelh hi a chak em em reng a, khelmual chhung leh a pawnah midang tana entawn tlak a ni," a ti a, a player a dahsang hle a, hmun pawimawh a chang chhunzawm bawk dawn a ni.

Premier League champion an tumna kawngah Arteta hian tlarhnung lam a ngaipawimawh a, a lai a ding William Saliba leh Gabriel te chu khawihchet thiang lo an ni. Ben White, Jurrien Timber leh Oleksandr Zinchenko te bakah Riccardo Calafiori te zingah a rin ber sawi a la harsa.

A bik takin White, Timber leh Zinchenko chungchang sawiin Arteta chuan, "Mual hnung lam sing lama khel tur chungchangah buaina kan nei deuh ṭhin, a chhan chu hliam an awm vang a ni. Tun hnaiah erawh an dam ṭan tawh a, kan chingfel thei ang.

"Kan player-te hi an inthlau lo a, an theihna a sang hlawmin an dinhmun pawh a inhnaih hlawm hle - inelna ṭha an hmachhawn dawn a ni," a ti a. Tumahin hmun nghet an chang dawn tih a sawi duh lo, thlauhthlak bik an awm lo tih a sawi bawk.

Zanina Bournemouth nen an inkhelh tur thlir lawkin Arteta chuan, "Coach ṭha takin a enkawl an ni a, team dang an hmachhawn pawhin an tih tur an chiang thei em em a, player tinin an hna thawh tur an chian avangin hmachhawn an harsa dawn tih a chiang.

A bik takin team lian hmachhawn dan an thiam, chuvangin keini lam pawhin kan theihtawp kan chhuah a ngai dawn a ni," a ti. International match khelh zawh chiah hian team lian tan pawh a harsa ṭhin, chuvangin Gunners tan fimkhur a ngai dawn a ni.

Spanish manager Arteta enkawl Arsenal hian tun season EPL match sarih an khelh tawhah tlawm an la nei lo, chutih rualin vawi hnih an inhnehtawk tawh thung. Liverpool leh Manchester City te nen nomawi an inchuh dawn a, boruak a sang chho khawp ang.