Sports minister hoin coach intuaihriam

Lalnghinglova Hmar, Sports & Youth Services Minister chuan Sports & Youth Services Directorate-a coach refresher course kalpui mek chu nimin khan a hmanpui a, Olympic 2036 a Mizo infiammi an tel ve theih na'n coach te'n mawhphurhna sang tak an nei tih a sawi.

Sports Minister Lalnghinglova Hmar chuan, coach te chu tih tak takna nen thawk a, Mizo infiammi te hmasawnna tura theihtawp chhuah turin a chah a. Coach-te chu mahni hna dah pawimawh hmasa ber tur leh, hun vawn dik leh inthunun chungchangah an zirlaite entawntlaka nung turin a fuih a, coach berin training a kal tlai chuan hmasawn a harsa tiin training pek dawnah a hun hmaa thleng ṭhin turin a chah.

Sports leh infiammite hmasawnna tura sorkarin hmachhawp a neihah thawhpui turin a sawm a, sorkarin Bana Kaih policy hnuaiah sports coaching lian tham zawka kalpui a tum mek thu a sawi bawk.

Sports & Youth Services Department chuan October 15 aṭangin coach-te tan intuaitharna (refresher) course a buatsaih a. October 15-16 chhung khan Seminar on Sports Medicine and First Aid neih niin, nimin leh vawiinah Seminar on Sports Psychology and Method of Training neih a ni thung.

Intuaihriamna hunah hian department coach-te bakah Khelo India State Centre of Excellence (KISCE), District Khelo India Centre (KIC) coach te leh scouts & guides, adventure wing staff mi 55 chuang an training a ni.