Davis Cup atan Nadal a inpeih beisei

Rafael Nadal chuan tennis tournament a khelh hnuhnung ber tur Davis Cup atan a inpeih hman ngei a beisei tih a sawi a, chutihrualin a singles match a khelh dawn leh dawn loh chungchangah thutlukna a la siam lo thung.

Grand Slam vawi 22 champion Nadal hian November thlaah Spain tan Davis Cup a khel dawn, ram leh ram mipa tennis team hmanga inelna hi hi singles leh doubles hmanga khelh tur a ni.

Kum 38 mi Nadal chuan, "Taksa bakah rilru a inpeih, chutihrualin a boruak erawh a danglam dawn. A hun la hla deuh mah se ka rilru a no riau a, engtiang taka hmachhawn tur nge tih pawh hriatthiam a harsa.

"A pawimawh ber chu kan ram tan a ṭha thei ang bera khelh a ni a, mimal ni loin team tana ṭha ber tur kan ngaihtuah a ngai ang. Chuvangin singles leh doubles ka khelh dan tur pawh team tana ṭha tur angin a ni ang," a ti.

Nadal hi a hun hnuhnung lamah hliamina tibuai nasa a, tun hnai kum hnih aia rei chu a inkhel mumal thei lo. Paris Olympic-ah pawh khan Spain tan feh chhuak mah se doubles match zawk a khel a, gold medal erawh an vaw chhuak zo lo.