Zanin dar 6:00-ah Mizoram Vs Jharkhand

29th Senior Women's National Football Championship for Rajmata Jijabai Trophy 2024-25-ah vawiin zanin dar 6:00 hian Mizoramin an match hmasa berah Jharkhand an hmachhawn dawn.

Group H-ah Mizoram hi Jharkhand leh Telangana nen an awm ho a, October 21, Thawhṭanni hian Telangana nen an inhmachhawn leh dawn. Group khat aṭangin team khat chauhin knockout stage an luh dawn avangin match tin hi final ang maia pawimawh a ni.

Mizoramah hian tawnhriat nei ṭha player an awm a; India tan pawha khel tawh Grace Lalrampari Hauhnar bakah theihna nei sang K. Ngopawdi, Lalduhthlani Pachuau, Lalthansangi, Cindy Remruatpuii Colney leh Lalrinmuani te chu innghahna tlak an ni a, inbuatsaihna an neih ṭhat bawk avangin result ṭha a beisei ngam ang.

Mizoram team hi Malsawmzuala Bawitlung-in an enkawl a, Sawmtea hian I League club Aizawl FC bakah Chawnpui FC pawh a enkawl tawh. Chawnpui FC-a amah puitu MS Dawngliana (Valpuia) chu assistant coach a ni a, hmeichhe football hrechiangtu SYS coach R. Lalnunsangi'n (Manuni) manager hna a chelh bawk.