Kompany 'Bayern Munich' fiahna

Bayern Munich chuan zanin dar 10:00 hian Champions League khel pha VfB Stuttgart an hmachhawn a, match hnuhnung pathuma chak hmel hmu lo Vincent Kompany hote tan fiahna a ni ang.

Bavarians hian season bul ṭan ṭha mah se Bundesliga champion lai Bayer Leverkusen nen 1-1 a inhnehtawk hnuah Champions League-ah Aston Villa 1-0 in an hneh lo a, international break hma chiahin Eintracht Frankfurt nen 3-3 in an inhnehtawk.

Kompany hoten insiamṭhat an mamawh a, Stuttgart zawhah Barcelona an hmachhawn lehnghal dawn. Catalan club laka inrintawkna nei turin zanina chak hi a pawimawh lehzual.

Bayern-in Jamal Musiala hliam vangin an chhawr thei lo a, mahse Michael Olise, Serge Gnabry leh Harry Kane te an neih avangin an goal bawh chu na viau tura ngaih a ni.

Stuttgart-in tun hnaia Germany tana che ṭha an kawl. Deniz Undav-a'n Germany-in Bosnia and Herzegovina 2-1 a an sawp ṭumin goal hnih a khung a, Julian Nagelsmann-a hoten Netherlands 1-0 a an hneh ṭumin Jamie Leweling-a'n goal awmchhun a khung bawk. Undav leh Leweling te hi Bayern tlarhnung tan an hnawksak thei ang.