La Liga: Kartawpah club lian inlan kim dawn

Barcelona-in coach thar Hansi Flick-a hnuaiah hma an sawn avangin La Liga a ngaihnawm thar a, Spanish top flight league hi fans tam takin an ngaihven thar - Barca, Real Madrid leh Atletico Madrid te inelna league hi ngaihthah chi a ni lo.

Tun dinhmunah Barcelona chu La Liga hmahruaitu an ni a, league match kua aṭanga point 24 hmuin table chung ber an luah mek - an hnuai chiahah Real an awm a, Carlo Ancelotti naute hian point thum chiahin an phak lo.

Barca leh Real inthlauhna hi en ila, match khat lekah engkim danglam vek thei a la ni tih a lang chiang a, hei hi league tingaihnawmtu a ni - Atletico Madrid chuan point 17 hmuin pathumna an ni mek.

Hmahruaitu Barca hian Pathianni zan dar 12:30-ah Sevilla an mikhual dawn a, Real-in zanin dar 12:30-ah Celta Vigo lenchilhin, Pathianni zan dar 7:45-ah Atletico Madrid chuan Leganes an mikhual bawk ang.

Courtois a dam

Inrinni zana an inlan hmain Real-in chanchin lawmawm hriat tur an nei a, goalkeeper Thibaut Courtois chu Madrid derby-a a inhliam hnuah a dam ṭha leh tawh - match hnih a inlan loh hnuah zanina inlan thei dinhmunah a ding.

Hetihrual hian coach Carlo Ancelotti-a'n indahṭhat a thupui zawk mai thei. Spanish club hian Thawhlehni zanah Champions League match khel turin Borussia Dortmund an mikhual dawn a, champion lai hi an UCL match hnuhnung bera Lille ngam lo an nih bawk avangin an fimkhur dawn.

Dortmund zawhah, October 26, Inrinni zanah Barcelona an mikhual zui dawn a, a awlsam dawn lo. Hei vang hian coach Ancelotti tan fimkhur taka player siksawi a ṭul dawn a, Celta lakah neih ṭhat ber thawhchhuahpui nghal a fuh lo mai thei.

Hetihlai hian striker chhuanvawr Kylian Mbappe chuan international break kha Sweden-ah chawlh a hmang a, mi pawngsuala puh a ni - French striker pawh hi tun hnai a buaina avangin a chawl hahdam mai thei.

Barca tan lawmna

Barcelona-in Pathianni zanah Sevilla an mikhual dawn a, Real ang thoin an fimkhur a ngai dawn - Nilaini zanah Champions League khel turin Bayern Munich an mikhual dawn a, kartawpah El Clasico an khel zui ang.

La Liga lamah kal vung viau angin lang mah se, vawi khat chetsuala dinhmun inthlak danglam theiah an la ding bawk a, Flick tan ngaihtuahna sen thiam ve tho a ṭul dawn. Mahse, an mikhual tur Sevilla hian kum 2010 khan khualmualah Barca an la ngam leh lo - Catalan club ṭantute thla a muang dawn.

Hetihlai hian Barcelona-in chanchin lawmawm hriat tur an nei tel a, international break-a inhliam Robert Lewandowski leh Lamine Yamal te chuan dan pangngai angin club training an zawm leh tawh a, Flick-a'n a duh chuan Sevilla lakah a chhawr thei ang.

Polish striker Lewy hi Bayern lama a pu hlui Flick-a hnuaiah a vul thar leh mek a, tun season inelna hrang hrangah match 11 khela goal 12 khungin, assist vawi hnih a nei a, kum 17 mi Yamal hian match 11-ah goal nga khungin assist vawi nga a nei - Barca-in tun season-a nomawi chawi an duh chuan player pahnih chet ṭhat zel hi a pawimawh dawn.