PSG leh Enrique inrem

Paris Saint Germain chuan an coach Luis Enrique chu hun rei zawk atan chhawr an duh a, an inremna hi puanzar la ni chiah lo mah se khawthlang chanchinbu rintlak te chuan an ziak tawh.

Player leh hralh bakah contract chungchang hre thei tak Fabrizio Romano chuan, PSG leh Enrique te inremna hi kum 2027 June thla thleng niin a ziak a, ruahmanna thui tak an nei tihna a ni.

Season hmasa aṭang khan Enrique hian PSG a enkawl ṭan a, kum dang ang bawkin Ligue 1 nomawi chawi an la leh mai. Mahse, club neitu lamin a duh ber Champions League erawh an la chawi thei rih lo.

Kylian Mbappe a chhuak a, an player ṭha chhuah hnuah tun hnai khan Enrique leh Ousmane Dembele ten boruak ṭha lo an nei leh zauh bawk a, an chinfel tawh tura ngaih a ni thung.

Ligue 1 champion hian zanin dar 12:30 hian Strasbourg an mikhual dawn. Paris club hian hmahruaitu AS Monaco chu point hnihin an phak lo mek a, chetsual a rem tawh lo.