Kan beidawng bik lo - Vowles

Formual 1 team Williams principal James Vowles chuan season hmang ṭha lo mah se an beidawng lo tih a sawi a, tun season intlansiak hmabak la awmah theihtawp chhuah an tum tih a sawi.

Car intlansiakna sang bera team inelna huangah Williams chu a hnuai lamah an awm, tun season intlansiak an neih tawh zawng zawngah point 16 chauh an la hmu, an hnuaiah Alpine leh Sauber te chauh an awm.

August thla khan Williams hian an car an siamṭha a, chumi hnuah an driver pahnih Alex Albon leh Franco Colapinto te chuan intlansiak pathum hmachhawn leh tawhin point an sual chhuak ve ve a ni.

Vowles chuan, "A tir lamah kan cheṭha tawk lo tih chu zep tur a awm lo, kan insiamṭhat hnuah erawh ṭha takin inelna kan hmachhawn thei a, tun aia ṭha lehzual hian season tawp kan hman ngei pawh ka ring.

"Hlawhtlinna chang tur chuan thil holam te te nia kan ngaihte kan siamṭhat a ngai a, chutiang tur chuan kawng dik pawh kan zawh mek a ni a, beidawng loin kan bei zel ang," a ti.

Pathianni zan dar 12:30 hian Circuit of the Americas-ah United States Grand Prix an tlan leh dawn. Williams hian point khat tal sual chhuah tumin inelna an hmachhawn leh ang.