Lukaku tan Conte hi coach duhthusam - Lucarelli

Napoli forward hlui Cristiano Lucarelli chuan Antonio Conte chu Romelu Lukakau tan duhthusama coach ṭha a nih thu a sawi a, an inkawp rem chu Naples club tana chanchin lawmawm a ni a ti bawk.

Belgium international striker Lukaku hi Chelsea leh Inter Milan ten an duh lo tia sawi theih a ni a, loan hmangin AS Roma tan pawh a khel, mahse nipui lai khan Conte chuan a kianga khel turin a lalut.

Italian manager Conte kaihhruaina hnuaha Lukaku-a'n a theihna sang tak a pholang leh mek. Serie A match sarih an khelh tawhah point 16 hmuin hma an hruai a, champion lai Inter Milan aiin point hnihin an sang zawk.

Lucarelli chuan, "Ka hmuh dan chuan Lukaku hi Napoli tana striker ṭha bik a ni a, amah enkawl tur chuan Conte-a hi duhthusama coach ṭha a ni bawk, hun rei lote chhungin danglamna nasa tak an siam.

"Lukaku hian theihna sang tak a nei a, tharum a ngahin goal khung a thei em em bawk. Coach dang hnuaia a khelh aiin Conte hnuaiah chuan a hlim zawk a, khelmual chhungah nuamti taka hun a hman chuan goal a khung leh mai ṭhin," a ti.

Kum 31 mi Lukaku hian tun season Serie A match vawi nga a khelh aṭangin goal thum a khung tawh. Naples club hian Pathianni tlai dar 4:00 hian Empoli an lenchilh dawn a, international match khelh zawh hnua an inlan lehna hmasa tur a nih avangin an fimkhur a ngai ang.