ISL-ah goal a sur

International break zawha Indian Super League match hmasa ber chu Ningani zan khan khelh a ni a, goal nga ngawt a lut nghal - Chennaiyin chuan 3-2 in NorthEast United an hneh a, South Indian club defender Laldinliana Renthlei chu hnawhchhuah a ni bawk.

Indira Gandhi Athletic Stadium, Guwahati-a inkhelah Highlander hian minute ngana lekah Nestor Albiach hmangin goal hmahruai an khung a, mahse, mikhual team hian chhanglet turin hun an mamawh rei lo.

Chennaiyin tan NorthEast United striker hlui Wilmar Jordan Gil chuan minute 25-naah si phurh a sut a, Brazilian attacking midfielder Lukas Brambilla chuan chawlhlawk hman hmain hmahruaina goal a khung zui.

South Indian club hian an duhtawk mai lo - second half ṭan aṭanga minute rukna lekah Wilmar Jordan chuan goal khat a khung ve leh a, 3-1 a ni der. NorthEast United tan Morrocan forward Alaaeddine Ajaraie chuan minute 89-naah khung ve leh mah se, a tlai hret tawh a, goal dang an hlawh chhuak hman tawh lo.

NorthEast United-in Mizoram player kawl an nei lo a, Chennaiyin-a Mizo player PC Laldinpuia, Dinliana leh midfielder Lalrinliana Hnamte ten inkhel bul an ṭan vek thung a, Dinpuia leh Terina ten minute 90 an khel tluan.

Armed Veng South tlangval Dinliana hian minute 83-naah a yellow card pahnihna a hmu a, hnawhchhuah a nih avangin a khel tluan ve ta lo.