Fabio Di Giannantonio an zai dawn

MotoGP rider Fabio Di Giannantonio chu a dar hliam zai a ni dawn a, bike intlansiakna season kal mekah hian intlansiak hnuhnung pahnih chu a hmachhawn ve thei dawn ta lo a ni.

Ducati-VR46 rider Di Giannantonio hi August thla a tlan zawh tak Austrian GP-ah khan a inhliam a, hliam nei mah se inelna a hmachhawn zui a, zai lohin a la intlansiak chhunzawm zel.

Mahse, a hliam hi zai loh chuan a dam mai dawn lo, hei vang hian zai hun an ti chiang ta a ni. Di Giannantonio chuan, "Ruahmanna kan nei dan chuan tun kar tawpa inelna Australia GP ka hmachhawn ang.

"Chu mai bakah Thailand lamah pawh ka tlan theiha rinawm, mahse Malaysia leh Valencia GP erawh ka hmachhawn thei ve dawn ta lo a ni. A tam thei ang intlansiak duh mah ila, thlasik chawlh chhung a rei loh avangin hliam enkawl hma a ngai," a ti.

MotoGP season kal laiah Di Giannantonio hi 10-na a ni mek a, atan champion beisei chi a ni tawh lo. Season thar tir lamah ṭha taka a inlan lehnghal theihna turin tun season tawp lamah an zai dawn tihna a ni.

Pathianni zan dar 8:30 hian Phillip Island Circuit-ah Australian Grand Prix an tlan ang.