Premier League Thlirna Chelsea-in champion turin point thum chiah mamawh tawh

Premier League champion nomawi chawi turin Chelsea-in point thum chiah an mamawh tawh. Nilaini zan khan an khingpui Leicester chu 3-1 in an hneh. Pathianni zan a Crystal Palace an hneh a nih chuan Manchester City lak aṭangin champion nomawi an chhuhsak ang.

Chelsea hian EPL match 34 khelh tawh aṭangin point 80 an hlawhchhuak tawh a, tun dinhmunah Man CIty aiin point 13-in an sang fal tawh a ni. Hetiah lai hian an hneh tak Leicester erawh point 31 hmuin relegation zone aṭangin an him chiah chiah rih thung.

An fimkhur

King Power Stadium a inkhelah hian tlakhlau Leicester an fimkur a, he tiang tho hian point hloh hlau Chelsea an fimkhur hle bawk. Jose Mourinho-a'n tlar hmah Didier Drogba a luh tir a, Leicester tlar hnung a chhiah buai thei meuh lo. Goal lut loin first hlaf an khel zo mai dawna alan laiin winger Marc Albrighton chuan minute 45-ah an hmahruaina goal a khung hlauh.

Mikhual huangtau

Chelsea tan point hloh hun a ni tawh lo, Albrighton-a goal khat thun in Chelsea a ṭhawng harh chiang hle. Second half an ṭan aṭanga minute thumna lekah defender tharumngah Branislav Ivanovic thawhrah sengin striker Drogba chuan an si phurh sutna goal a khung zui ve nghal.

Chelsea tan point khat a lungawi na hun a ni tawh lo a, Leicester tan chuan point khat hmuh pawh a pawimawh tawh. Arsenal midfielder hlui Cesc Fabregas bawk a langsar leh a, corner aṭanga ball lo kal chu Gary Cahill-a'n lo tauhin captain John Terry-a'n awlsam tein an hmahruaina goal a khung. Leicester inrin hman hmain Ramires kan hmu zui a, box pawn chiah aṭangin goalkeeper tana man ngaihna awm lo khawp a kawhin a thlawh lut, 3-1 in chelsea-in hma an hruai. Inkhel tawp thlengin goal dang a lut tawh lo a, champion turin Chelsea dinhmun a duhawm tawh hle.

Inkhel behbawm

Leicester laka a goal thun kha Terry-a'n Premier League a goal 38 a khungna chiah a ni a, Everton defender hlui David Unsworth-a goal thun zat a nih rual chiah. Anni pahnih hi defender zingah chuan EPL a goal khung hnem ber an ni. Tunhnai Premier League season 15 chhungin Terry hian goal ala khung ziah a ni.

Season ṭan dawna Barcelona aṭanga Chelsea zawmtu Fabregas hian tun season-ah a ṭhiante goal thun tur vawi 17 zet a siamsak tawh. Kum 2007-08 season a Arsenal tana a record lo siam tawh chu a nihrual chiah.

Premier League-ah Fabregas aia assist nei tam hi mi pahnih chiah an la awm a Thierry Henry-an kum 2002-03 a vawi 20 assist a neih leh Frank Lampard-a'n kum 2004-05 a vawi 18 assist a neih te kha an ni. Tuna a khelh dan thlir chuan Fabregas hian a khum lo ang tih a sawi theih loh.

Leicester goal neihchhun khungtu Albrighton khan a club tana a goal hmasa ber a khung na chiah a ni.Kum 2011 khan Aston Villa tan goal a lo khung tawh a, kha goal kha Premier League history a goal 20,000 na chiah a ni nghe nghe.

Eng nge an sawi?

Leicester manager Nigel Pearson chuan, "Kan khelh dann thlir chuan 3-1 kha chu a awm lo deuh a ni. Hmahruaitu kan ni zuaia, mahse kan fimkhur tawk loh vangin goal kan chhuah zui hma hle. Kan quality a inthlauh deuh avangin a harsa a, amaherawhchu kan khelh dan en kha chuan point khat tal chu hlawhchhuak thei tur chu kan ni," tiin a sawi.

Chelsea manager Mourinho chuan, "Season tawp dawn thlenga hmahruaitu ni tur chuan season tluana khelh ṭhat a ngai a, chutiang ti thei chu keini hi kan ni. Tunah hian Stamford Bridge chu Pathiannia champion lawm turin a inpeih tawh a, mahse chetsual theih ala nih avangin kan fimkhur erawh a ṭul ang," tiin a sawi.