Liverpool chhuahsan tumtu defender Glen Johnson

June thlaa a contract neihlai tawp mai tawh tur Liverpool defender Glen Johnson chuan season tharah club dang a zawm a rin thu a sawichhuak.

Chelsea leh Ports­mouth defender hlui chuan, "June thlaah ka contract a tawp tawh dawn avangin season tawpah hi chuan ka chhuah ka ring tawh. Season tawp nghak thleng phawt ila, engkim a chiang ang. Match li khelh tur kan la nei a, ka theihna zawng zawngin hmabak kan la neihah te hian ka khel ang," tiin contract thar la ziak lo mah se a theihtawp a chhuah chhunzawm zel tur thu a sawi.

Premier League-a pangana ni mek Liver­pool tan Johnson hi tun season-ah a khel tam lo hle a, Premier League match 17 a khelha match 13 ah chiah bul a ṭan ve a ni.

Johnson chuan season thara champion tur chuan Liverpool chuan player thar ṭha zawk lakluh an mamawh thu sawiin, "Player la naupang leh hmabak nei eng tak tak kan kawl ṭeuh a, mahse thlamuanpui tham an ni lo. Kum dangah pawh player naupang ṭha tak tak hi chu kan kawl reng ṭhin a, kan mamawh ber chu player ṭha leh rintlak lakluh a ni," a ti.