AC Milan fans an lungawi lo

Europe a club ṭha ber pawl ni ṭhin AC Milan in beisei an phak lo tluang zel a, fans lungawilohna pawhin a tawngsang tawh hle.

Nilaini zana mikhual team Genoa laka 1-3 a an tlawm ṭumin Milan fan-te chuan lungawilohna an lantir leh a, stadium chhungah lian takin 'Basta' (A tawk zozai tawh) tih chu an tilang.

Serie A title 18 chawi tawhtu Milan hian tun season Serie A match sawm chhung chu chak hmel an hmu tawh lo a, table-ah 10 naah an awm mek.

European Cup-ah pawh vawi sarih champion tawh Milan fan-te hian March thlaa Cagliari 3-1 a an hneh ṭumin lungawilohna an lo lan tir tawh bawk a, manager Filippo Inzaghi dinhmun a derthawng tawh hle.

Club neitu Berlusconi chuan AC Milan hi Thai sumdawng hausa Bee Taechaubol hnenah hralh a tum niin thuthang a awm mek.