Hasselbaink leh Leeds an sawi zawm
Chelsea striker hlui League two club Burton Albion manager ni ta Jimmy Floyd Hasselbaink chuan Championship club Leeds United manager hna a chelh dawn leh dawn lohah thuchiang engmah a awm loh thu a sawi.
Player a nih laia Leeds United tan match 69 a khelha goal 34 khungtu Hasselbaink chuan, "Leeds hi ka tan chuan club ngainatawm tak a ni a, ka zawm dawn leh dawn lohah hi chuan ka lunglenna tih vel aiin ka thluakin ti tura min hrilh angin thutlukna ka siam ang," tiin a club hlui a nih vang ringawta zawm tumna a neih loh thu a sawi.
Netherlands tana match 23 kheltu Hasselbaink chuan, "Tunah rih chuan Leeds chungchang sawi vak hi ka duh rih lo. Manager ṭha tak enkawlna hnuaiah an awm meka, keiin nuam ka tih em em na hmunah hna ka thawk mek bawk a ni," tiin a hmalam hun a sawichiang duh lo.
Chelsea tan match 136 a khelha goal 70 khungtu Hasselbaink hian nikum November thla khan Burton Albion hi a zawm a, a zawm laia League two table-a pangana ni mek team kha tunah chuan League One-ah hlangkai in season ṭha tak a hmanpui.