Formula 2 champion Mick Schumacher

Mick Schumacher chu Formula Two champion a ni. Inelna hnuhnung ber Bahrain-a an neih ṭumin che ṭha tawk lo mah se season tluana a chet ṭhat tawhna vangin midang tan umphak theih a ni tawh lo.

Kum 21 mi Mick hi Formula 1 legend Michael Schumacher-a fapa a ni a, inelna hnuhnung berah hian 18-na daih ni mah se a elpui ber Callum Ilott pawh 10-naah daih a thlen avangin a champion ta tho a ni.

Schumacher hian champion turin point 215 a hmu a, amah hnaih bertu Ilott aiin point 14 in a sang zawk. Formula 1 team Red Bull zawm tur anga sawi Yuki Tsunoda chu pathumnaah awmin pahnihna a phak lohna chu point khat chauh a ni thung.

Season thara F1 team Haas car khalh tur Mick chuan, "Inelna hnuhnung ber ka tlan fuh tawk loh avangin lawm a kim lo, champion ka ni tih pawh hi awih mai a har hle. Chutih- rualin tun dinhmun thleng tur hian season tluanin hna ṭha takin kan thawk a ni," a ti.