La Liga Real Madrid-in Barca um zel
Nilaini zan khan Real Madrid chuan Almeria 3-0 a hnehin point thum an hmu a, La Liga hmahruaitu Barcelona nen an inthlauhna ti zim lehin point 82 an hlawhchhuak ta. Barca an phak lohna chu point hnih chiah a ni tawh.
First half a James Rodriguez a goal thun hmangin Real-in hma an hruai a, Almeria central defender Mauro Dos Santos-a'n Toni Kroos-a ball cross anmahni lamah a tih goal palh bakah Alvaro Arbeloa chuan an chakna nemnghet turin goal khat dang a khung ve bawk.
Kum 16 a upa Norway midfielder Martin Odegaard chu squad-ah telh ni mah se khelmual chhungah a lut ve rih lo a, bench aṭangin a ṭhiante inkhel a en tluan a ni.
January a Stromsgodset aṭanga an lakluh Odegaard hi tun season-ah a khelh chuan Real tana first team a khel thei naupang ber a ni thei dawn a, mahse a khelh hun tur ala nghah rih deuh a ngai maithei.
Real Madrid manager Carlo Ancelotti chuan, "Tunah chuan thi leh dam kara leng kan ni ta, champion nomawi hi Barca kutah ala awm chiah bik lo. Inkhelh hmabakah kan chak ve thei a nih chuan eng nge la thleng dawn kan hria ang chu. Barcelona hian point an la hloh lo ang tih hi sawi har tak a nih avangin Real tan chuan tha thlah san chi a ni lo ang," tiin a sawi.
Inkhel dangah Atletico Madrid chuan Fernando Torres a goal khat thun hmangin an elpui Villarreal chu 1-0 in an hneh ve bawk. Torres-a'n a naupan lai aṭanga a atchilh em em Atletico tan minute 73-ah he inkhel a goal awmchhun hi a khung a, a team te chu season thara Champions League khel leh thei turin dinhmun duhawm takah a dah a ni.
Atletico Madrid coach Diego Simeone chuan, "Zanin khan Fernando Torres tak tak kan hmu leh. Goal hmaah hian a talbuai lo mai ni loin a 'cool' em em zel a, lehlam pawl tan chuan a tawrhhlehawm ṭhin reng a ni. Fans ten an ṭan leh duh em em anih avang hian a goal thun theih piah lamah kan club tan chuan mi pawimawh tak chu a ni ve hrim hrim," tiin a striker chungchang a sawi.
Hetih lai hian chak zo lo Villarreal tan erawh season thar Champions League beiseina a tawp ta a, point 53 hmuin table-ah parukna an ni mek a ni.
Inkhel Results
Real Madrid 3 - 0 Almeria
Celta de Vigo 1 - 0 Malaga
Eibar 1 - 3 Sevilla
Elche 4 - 0 Deportivo
Villarreal 0 - 1 Atl Madrid