Juventus-in champion an hnaih

Serie A-ah a zawna vawi li champion turin Juventus dinhmun a ṭha tawh hle. Nilaini zan khan Turin khaw club hian mikhual lakah ṭhat an chhuah duh lo a, Carlos Tevez-a goal hnih khung leh Fernando Llorente-a goal khat thun chhawr ṭangkaiin 3-2 in an mikhual Fiorentina chu an hneh a ni.

The Old Lady tia hminglem an vuahsak Juventus hian Serie A-ah point 14 laiin hma an hruai fal tawh a, match nga chiah khelh tur an nei tawh bawk. Inrinnia Sampdoria an hmachhawn hunah draw result ringawt an hlawhchhuak thei a nih pawn an champion tawh ang.

Juventus hi inelna pathuma champion turin an dinhmun a ṭha tawh hle. Italian Cup final-ah Lazio hmachhawn turin an in pet kai tawh a, Champions League-a an beiseina pawh chhawm nung zelin semi final-ah Real Madrid an hmachhawn dawn. Kum 1996 hnuah Juventus hian Champions League nomawi an la chawi leh lo.

Division hniam lamah Parma

Khawvel huap pawha player lar tak tak Gianluigi Buffon, Hernan Crespo leh Hidetoshi Nakata te lo khelh tawh ṭhinna Parma chu khualmualah 0-4 laia Lazio laka an tlawm avangin Serie B-ah an tla thla. Khelmual neitu Lazio tan Marco Parolo, Miroslav Klose, Antonio Candreva leh Balde Keita te'n goal khat ṭheuh an khung a ni.

Parma hi sum lamah an talbuai a, tunah hian leiba pound maktaduai 54 an nei mek. An player te hlawh an pe ṭha hleithei lo a, team bus khalhin an thawmhnaw suk sak tu tur pawh an nei lo. Sum lama an tlakchhiatna hian khelmual chhungah pawh nghawng a nei a, tunah chuan Serie B lamah an tla ta.

Inkhel dang results

Cesena 2-2 Atalanta

Chievo 1-0 Cagliari

Juventus 3-2 Fiorentina

Milan 1-3 Genoa

Sampdoria 1-1 Hellas Verona

Lazio 4-0 Parma

Sassuolo 0 - 3 Roma

Palermo 2-2 Torino